جرمنی-----تمباکو نوشی سے گریز، صحت مند وزن برقرار رکھنے کی جدوجہداورنشے جیسی لعنت سے دوری صحت مند اور طویل زندگی کی کنجی ثابت ہونے والی عادات ہیں۔یہ بات جرمنی میں ہونے والی ایک طبی تحقیق میں سامنے آئی۔میکس پلانک انسٹیٹوٹ فار ڈیموگرافک ریسرچ کی تحقیق میں بتایا گیا ہے کہ اچھا طرز زندگی، ذیابیطس، امراض قلب، دماغی خلیوں کے انحطاط اور دیگر کئی جان لیوا امراض سے تحفظ دے کر طویل عمر کے امکانات کو بڑھاتا ہے۔ اس تحقیق کے دوران 50 سال سے 89 برس کی عمر کے 14 ہزار سے زائد افراد کے ڈیٹا کا جائزہ لیا گیا۔نتائج سے معلوم ہوا کہ جو لوگ تمباکو نوشی اور نشے سے گریز اور جسمانی وزن میں کمی لاتے ہیں، ان کی زندگی کے دورانئے میں 7 سال تک کا عرصہ بڑھ سکتا ہے اور موت تک ان کی صحت بھی اچھی رہتی ہے۔اس کے علاوہ یہ بھی مزید بتایا گیا ہے کہ جو مرد مٹاپے کا شکار نہیں ہوتے اور تمباکو نوشی سے گریز کرتے ہیں، ان کی عمر میں اوسطاً 11 سال تک کا اضافہ ہوجاتا ہے۔اس کے مقابلے میں خواتین میں یہ دورانیہ 12 سال تک پہنچ سکتا ہے۔ محققین نے کہا کہ صحت مند طرز زندگی کے متعدد فوائد ہوتے ہیں اور اس کا حصول ناممکن بھی نہیں۔انہوں نے کہا کہ جو لوگ صحت کے لئے نقصان دہ رویوں سے گریز کرتے ہیں، وہ لمبی اور صحت مند زندگی گزارتے ہیں۔
