نشان حیدر ہاکی ٹورنامنٹ: ارجنٹائن کے 4 گول کیپرز پہنچ گئے

  کراچی: نشان حیدر ہاکی ٹورنامنٹ میں شرکت کیلئے ارجنٹائن کے 4 گول کیپرز کراچی پہنچ گئے ۔ایئرپورٹ پہنچنے پر پی ایچ ایف آفیشلز نے ان کا استقبال کیا اور گلدستے پیش کرتے ہوئے انہیں خوش آمدید کہا۔ پاکستان ہاکی فیڈریشن کے زیر اہتمام نشان حیدر نائن اے سائیڈ ہاکی ٹورنامنٹ 3 سے 10 اکتوبر کے درمیان کراچی میں کھیلا جائے گا جس میں شامل ٹیمیں نشان حیدر حاصل کرنے والے تمام 11 شہداء کے ناموں سے منسوب ہونگیں۔ ٹیموں کے نام کیپٹن راجہ محمد سرور، میجر طفیل محمد، میجر راجہ عزیز بھٹی، راشد منہاس، میجر شبیر شریف، سوار محمد حسین، میجر محمد اکرم، لانس نائیک محمد محفوظ، کیپٹن کرنل شیر خان، حوالدار لالک جان اور نائیک سیف علی جنجوعہ رکھے گئے ہیں۔ اس ایونٹ کی خاص بات یہ ہے کہ ایونٹ میں حصہ لینے والے تمام 11 گول کیپر غیر ملکی ہونگے جن میں سے ارجنٹائن کے 4 گول کیپرز پہنچ چکے ہیں۔ہر ٹیم 13 کھلاڑیوں اور 2 آفیشلز پر مشتمل ہوگی۔ ایونٹ میں جہاں تمام ٹیموں کے گول کیپرز غیر ملکی ہونگے وہیں میچز سے قبل پنالٹی شوٹ ہونگے جو ٹیم اس میں کامیابی حاصل کرے گی اسے ایک پوائنٹ میچ سے قبل دیا جائے گا جبکہ باقی 2 پوائنٹس میچ جیتنے والی ٹیم کو ملیں گے۔