ملتان ...پیپلزپارٹی کے چیئرمین بلاول بھٹو زرداری نے کہا ہے کہ نوازشریف 3 مرتبہ ملک کے وزیراعظم بنے لیکن میٹرو کے سوا کچھ نہیں کیا،مسلم لیگ(ن)ختم ہوچکی۔2018ءکے الیکشن میں مسلم لیگ(ش) اور تحریک انصاف سے مقابلہ ہوگا۔ ملتان میں پریس کانفرنس کرتے ہوئے انہوں نے کہا کہ نوازشریف نے تاریخ بنائی کہ وہ3 مرتبہ ملک کے وزیراعظم بنے لیکن اپنے 3 ادوار میں میٹرو کے سوا کوئی کام نہیں کیا۔ملتان میٹرو پر کوئی سفر بھی نہیں کرتا۔انہوں نے کہا کہ مسلم لیگ نواز ہمیشہ کے لئے ختم ہوچکی ہے۔نوازشریف باہر ہوگئے۔عوام کو غرض نہیں کہ کسی کو کیوں نکالا۔پیپلزپارٹی ملک کی واحد نظریاتی جماعت ہے جس نے انقلابی اقدامات کئے،صرف شوبازی نہیں کی۔انہوں نے کہا کہ ایک مضبوط الیکشن کمیشن چاہتے ہیںجس پر کسی کو اعتراض نہ ہو۔چاہتے ہیں کہ الیکشن کمیشن خود اصلاحات کرے۔انہوں نے مزید کہا کہ رائیونڈ میں لوڈشیڈنگ ختم ہونے کا مطلب یہ نہیں کہ پورے ملک میں ختم ہوگئی ۔ایک سوال پر بلاول نے کہا کہ پانی ایک اہم مسئلہ ہے تاہم کالا باغ ڈیم پر سندھ اور خیبرپختونخوا کے تحفظات ہیں۔
