2سال میں ہندکے 3 ٹیسٹ فکسڈ تھے!

دبئی :کرکٹ کے میدان میں تہلکہ مچانے والی وکٹ فکسنگ کی خفیہ ویڈیو میں فکسرز کی جانب سے گزشتہ 2سال میں ہند کے 3ٹیسٹ میچ فکسڈ ہونے کا دعویٰ کیا گیا ہے۔الجزیرہ کی کرکٹ کرپشن پر ڈاکومینٹری نے مزید رازوں سے پردہ اٹھا دیا ہے اور رپورٹ کے ایک حصے میں ہندکے گزشتہ 2 سال میں 3 ٹیسٹ فکسڈ ہونے کا دعویٰ بھی سامنے آیا ہے۔خفیہ وڈیو میں فکسرز نے دعویٰ کیا ہے کہ ہنداور انگلینڈ کے درمیان چنئی ٹیسٹ میں کرپشن ہوئی جبکہ ہنداور آسٹریلیا کے درمیان رانچی ٹیسٹ بھی فکسڈ تھا۔رپورٹ میں دعویٰ کیا گیا کہ گال میں ہنداور سری لنکا کے درمیان میچ میں بھی گڑبڑ ہوئی تھی۔یاد رہے کہ ہنداور انگلینڈ کے درمیان چنئی ٹیسٹ 16 دسمبر 2016 کو کھیلا گیا تھا اور اس میچ میں ہندنے ایک اننگز اور 75 رنز سے کامیابی حاصل کی تھی۔ ہند اور آسٹریلیا کے درمیان رانچی ٹیسٹ 16 مارچ 2017 کو کھیلا گیا لیکن یہ میچ بغیر کسی نتیجے کے ختم ہوا جبکہ ہنداور سری لنکا کے درمیان گال ٹیسٹ 26 جولائی 2017 میں کھیلا گیا جس میں ہندنے 304 رنز سے کامیابی حاصل کی تھی۔دوسری جانب سی ای او کرکٹ آسٹریلیا جیمز سدر لینڈ کا کہنا ہے کہ الجزیرہ کی وکٹ فکسنگ کے واقعے سے آگاہ ہیں اور معاملے کی مکمل تحقیقات کی جائیں گی۔ آئی سی سی اینٹی کرپشن یونٹ کے ساتھ مکمل تعاون کیا جائے گا۔یاد رہے کہ گزشتہ روز منظر عام پر آنے والی اس ویڈیو میں گراونڈ اسٹاف کو سری لنکا اور انگلینڈ کے درمیان نومبر میں کھیلے جانے والے ٹیسٹ کے لیے وکٹ فکسنگ کی یقین دہانی کراتے دکھایا گیا تھا۔