اسکاٹ لینڈ سیریز: پہلا ٹی ٹوئنٹی پاکستان نے جیت لیا

ایڈنبرا: اسکاٹ لینڈ کے ساتھ 2 ٹی ٹوئنٹی میچوں کی سیریز کا پہلا میچ پاکستان نے باآسانی 48رنز سے جیت لیا۔ پاکستان کے کپتان سرفراز احمد نے ٹاس جیت کر پہلے کھیلنے کا فیصلہ کیا اور اسکاٹ لینڈ کو جیت کیلئے 205 رنز کا نسبتاً مشکل ہدف دیا۔پاکستان نے مقررہ 20 اوورز میں 4 وکٹ کے نقصان پر 204 رنز بنائے ، فخرزمان اور احمد شہزاد نے 33 رنزکا آغاز فراہم کیا ، احمد شہزاد چوتھے اوور میں 14 رنز بنا کر آوٹ ہوئے۔حسین طلعت نے فخرزمان کے ساتھ ملکر صرف 13 رنز کا ہی اضافہ کیا تھا کہ فخرزمان 21رنز بنا کر وکٹ گنوا بیٹھے جس کے بعد کپتان سرفراز احمد بیٹنگ کیلئے آئے اور حسین کے ساتھ 41 رنز کی اہم شراکت قائم کی ، حسین طلعت 18 رنز بنا کر آوٹ ہوئے توکپتان نے شعیب ملک کے ساتھ 96 رنز کی جارحانہ شراکت قائم کی، اس دوران دونوں بلے بازوں نے اپنی نصف سنچریاں مکمل کیں، شعیب ملک نے5چھکوں کے ساتھ 27 گیندوں پر 53 رنز بنائے۔ کپتان سرفراز نے اپنے ٹی ٹوئنٹی کی بہترین اننگز کھیلتے ہوئے 89 رنزناٹ آوٹ بنائے جس میں 3 چھکے اور 10 چوکے شامل تھے۔سرفراز احمد کو شاندار بیٹنگ کرنے پر مین آف دی میچ کا اعزاز دیا گیا۔جواب میں اسکاٹ لینڈ کی ٹیم 6وکٹوں پر156رنز بنا سکی۔ جارج منسی اور کائیل کوئٹزر نے ٹیم کو 53 رنزکا آغاز فراہم کیا، کپتان کائیل 31 رنز پر محمد نواز کا شکار بنے، منسی کی وکٹ حسن علی کے حصے میں آئی وہ 25 رنز بناکر آوٹ ہوئے۔جس کے بعد شاداب خان نے لگاتار دو کھلاڑیوں کو آوٹ کر کے میزبان ٹیم کی مشکلات میں اضافہ کردیا۔ مڈل آرڈر بلے باز ڈیلان بج نے مزاحمت کی کوشش کی لیکن محمد عامر نے انہیں 24 رنز پر آوٹ کردیا۔ حسن علی نے کراس کو پویلین بھیج کر اس شراکت داری کا خاتمہ کیا، وہ 13 رنز ہی بناسکے۔آخر میں مائیکل لیسک نے کچھ وقت وکٹ پر گزارنے کی کوشش کی لیکن مقررہ اوورز نے ساتھ نہیں دیا اور وہ 38رنز بنا کر ناٹ آوٹ رہے۔اسکاٹ لینڈ کی جانب سے ڈیلان بج اور حمزہ طاہر کا ڈبیو تھا۔ٹی ٹوئنٹی سیریز کا دوسرا میچ کل کھیلا جائے گا۔ واضح رہے ون ڈے رینکنگ میں 11ویں نمبر پر رہنے والی اسکاٹ لینڈ کی ٹیم نے دو روز قبل رینکنگ میں ٹاپ ٹیم انگلینڈ کو ون ڈے میچ میں سنسنی خیز شکست دے دوچار کیا تھا۔