پولنگ اسٹیشنز پر 19 ہزار مشاہدہ کار تعینات ہوں گے
اسلام آباد: رواں ماہ ہونے والے عام انتخابات کے مشاہدے کے لیے فافن تنظیم کے 19 ہزار تربیت یافتہ اور غیر جانب دار مشاہدہ کار تعینات کیے جائیں گے جو ملک بھر کے 58 فیصد پولنگ اسٹیشنوں پر ووٹنگ و گنتی کے عمل کا مشاہدہ کریں گے۔
ذائع کے مطابق فری اینڈ فیئر الیکشن نیٹ ورک (فافن) 50 سے زائد مختلف تنظیموں کا ایک نیٹ ورک ہے جو 2008ء سے انتخابات کا مشاہدہ کررہا ہے۔ الیکشن کمیشن نے اس کے لیے فافن کی درخواست منظور کرتے ہوئے چاروں صوبوں کے الیکشن کمشنرز کو ضابطے کی کارروائی پوری کرکے مشاہدہ کاروں کو اجازت نامے جاری کرنے کی ہدایات جاری کردی ہیں۔
ذائع کے مطابق پنجاب بھر میں9554، سندھ 4225، خیبر پختونخوا بشمول فاٹا 3549، بلوچستان1117اوراسلام آباد میں 225 مشاہدہ کار انتخابی عمل کا مشاہدہ کریں گے جو پولنگ اسٹیشنوں کے گردانتخابی ماحول، سیاسی وانتخابی تشدد، ووٹنگ کے انتظامات،پولنگ بوتھوں میں ووٹنگ کے عمل،ووٹوں کی گنتی اورانتخابی نتائج کی تیاری کے مراحل کے ساتھ خواتین کوحقِ رائے دہی کے استعمال میں درپیش رکاوٹوں کابھی جائزہ لیں گے ۔
