عمان ۔۔۔امریکی حکومت کی جانب سے فلسطینی پناہ گزینوں کی بہبود کے ذمہ دار ادارے‘اونروا‘ کی امداد بند کیے جانے کیخلاف اردن میں مقیم فلسطینی پناہ گزینوں نے احتجاجی مظاہرہ کیا۔عمان میں قائم فلسطینی پناہ گزین کیمپ’’الوحدت‘‘ کی مرکزی جامع مسجد سے سیکڑوں افراد کا ایک جلوس نکلا جو ریلی کی شکل میں جنوبی عمان میں’اونروا‘ کے انتظامی امور کے دفتر کے سامنے جا کر ختم ہوا۔مظاہرین نے ہاتھوں میں بینرز اور کتبے اٹھا رکھے تھے جن پر امریکہ کی طرف سے فلسطینی پناہ گزینوں کی امداد بند کیے جانے کیخلاف شدید نعرے درج تھے۔ ریلی سے خطاب کرتے ہوئے فلسطینی پناہ گزین رہنماؤں نے امداد کی بندش کو امریکہ کی انتقامی کارروائی اور صہیونی نوازی قرار دیا۔
