سعودی فرمانروا کی دعوت پر عمران خان آج ریاض پہنچیں گے

اسلام آباد:  وزیر اعظم عمران خان اپنے پہلے سرکاری دورے پر آج سعودی دارالحکومت ریاض پہنچیں گے۔ ترجمان دفتر خارجہ کے مطابق وزیرا عظم اپنے 2 روزہ دورے کے پہلے مرحلے میں سعودی عرب روانہ ہوں گے۔ واضح رہے کہ انہیں سعودی فرمانروا سلمان بن عبدالعزیز اور ولی عہد محمد بن سلمان کی جانب سے دورے کی دعوت دی گئی تھی۔ بعد ازاں عمران خام متحدہ عرب امارات کا بھی سرکاری دورہ کریں گے۔
دفتر خارجہ کے مطابق وزیر اعظم قیام کے دوران سعودی فرمانروا اور ولی عہد سے الگ الگ ملاقاتیں کریں گے اور او آئی سی کے سیکرٹری جنرل ڈاکٹر یوسف بن احمد سے بھی ملاقات کریں گے ۔ وزیراعظم کے ساتھ وزیر خارجہ، وزیر خزانہ اور مشیر تجارت بھی ہوں گے جو اپنے اپنے سعودی ہم منصب سے ملاقاتیں کریں گے ۔
ترجمان کا کہنا ہے کہ سعودی فرمانروا وزیر اعظم کے اعزاز میں شاہی محل میں ضیافت بھی دیں گے۔ وزیراعظم سعودی عرب میں قیام کے دوران روضہ رسولؐ پر حاضری بھی دیں گے اور عمرہ کی سعادت حاصل کریں گے ۔
دفتر خارجہ کا کہنا ہے کہ بدھ کی شام وزیراعظم اپنے وفد کے ساتھ متحدہ عرب امارات پہنچیں گے جہاں ائر پورٹ پر متحدہ عرب امارات کے ولی عہد محمد بن زید النہیان وزیراعظم کا استقبال کریں گے۔ وزیراعظم متحدہ عرب امارات کے ولی عہد کی دعوت پر یہ دورہ کر رہے ہیں۔

مزید پڑھیں:- - - - -بیرون ملک کرنسی لے جانے کی حد کم کرنے پر غور