حکومت کیخلاف عدم اعتماد کا وقت نہیں آیا،زرداری

اسلام آباد...سابق صدر آصف  زرداری حکومت کے خلاف اپوزیشن جماعتوں کو اکھٹا کرنے کے لئے متحرک ہوگئے ۔ آصف زرداری اور فضل الرحمان کے مابین حکومت کے خلاف مشترکہ لائحہ عمل اختیار کرنے پر اتفاق رائے ہوگیا ۔ پیر کی شب سابق صدر آصف علی زرداری متحدہ مجلس عمل کے سربراہ مولانا فضل الرحمن کے گھر پہنچے اور ان سے ملاقات کی ۔ دونوں رہنماوں نے حکومتی پالیسیوں پر اپوزیشن کی مشترکہ حکمت عملی پر اتفاق کیا ۔ بعد ازاں میڈیا سے بات چیت کرتے ہوئے سابق صدر آصف علی زرداری نے کہاکہ اس وقت ملک میں جمہوری قوتیں کمزور نظر آتی ہیں ۔ انہوںنے کہاکہ اپوزیشن جماعتیں حکومت گرانا نہیں بلکہ ملک کو جمہوریت پر چلانا چاہتی ہیں ۔ ملک میں جمہوریت کی بقاءکےلئے اپنا فرض نبھا رہے ہیں ۔ انہوںنے کہاکہ اپوزیشن الائنس کےلئے سب سے بہترین وقت مشرف کا تھا ۔موجودہ حکومت سے کوئی بات نہیں کرونگا ۔انہوں نے کہاکہ موجودہ حکومت کے خلاف عدم اعتماد کا ا بھی وقت نہیں ۔ جب وقت آئے گا تو بتا دیا جائے گا ۔ حکومت کے خلاف عدم اعتماد کی باتیں اپوزیشن کی تمام سیاسی جماعتوں کے سامنے رکھیں گے ۔ انہوںنے کہاکہ میں اور فصل الرحمان نے 10سال تک جمہوریت کےلئے مل کر کام کیا ہے ۔ مولانا صاحب میرے دوست بھائی اور خیر خواہ ہیں ۔ انہوںنے کہاکہ ہمیشہ کوشش کی ہے کہ غیر جمہوری قوتوں کو آگے آنے کا موقع نہ ملے ۔ ملک کی بہتری کےلئے تمام سیاسی جماعتوں کے ساتھ بات چیت کریں گے ۔ انہوںنے کہاکہ حکومتی اتحاد میں شامل بی این پی اور ایم کیو ایم کے ساتھ بھی بات کی جائے گی ۔ اس موقع پر ایم ایم اے کے سربراہ مولانا فضل الرحمان نے کہا حکومت کی کوئی اخلاقی حیثیت نہیں ۔ یہ جعلی مینڈیٹ کی حامل حکومت ہے ۔ انہوںنے کہاکہ حکومت کے خلاف تحریک چلانے کےلئے ساری اپوزیشن ملکر ایک موقف اختیار کرے گی ۔ اگلے چند دن میں آل پارٹیز کانفرنس بھی منعقد کی جائے گی ۔