ریاض۔۔۔ سعودی مجلس شوریٰ نے سامان تجارت میں ملاوٹ کے انسداد سے متعلق وزارت تجارت و سرمایہ کاری کی کوششوں پر بے اعتباری کا اظہار کردیا۔ شوریٰ میں اقتصادی امور کی کمیٹی کا کہنا ہے کہ سامان تجارت میں ملاوٹ تشویشناک حد تک بڑھ گئی ہے۔ وزارت تجارت کو تجارتی جعلسازی کے انسداد کیلئے قومی حکمت عملی جلد ازجلد تیار کرنا ہوگی۔ مجلس شوریٰ نے توجہ مبذول کرائی ہے کہ وزارت تجارت قدیم تجارتی قوانین کو ترک کرکے نئے تجارتی قوانین ترتیب دے، تجارتی عدالت کا نیا نظام لائے، تجارتی تنازعات طے کرنے کیلئے مناسب ماحول برپا کرے، تجارتی اداروں کی کارکردگی جانچنے والا نظام تشکیل دے۔ نجی اداروں کو بین الاقوامی تنظیم تجارت کے قواعد و ضوابط سے آگاہ کیا جائے۔ عالمی تنظیم تجارت نے جو حقوق و فرائض مقرر کئے ہیں ان سے نجی اداروں کو مطلع کیا جائے۔ نجی اداروں کو قومی اقتصاد کے مفادات کے دفاع میں شریک کیاجائے۔ سعودی عرب کے تجارتی مفادات کی نمائندگی عالمی تنظیم تجارت کے یہاں احسن شکل میں کی جائے۔
