اسلام آباد: مذہبی آزادی سے متعلق امریکی وزیر خارجہ کا بیان پاکستان نے مسترد کردیا۔ ذرائع کے مطابق دفتر خارجہ کے ترجمان کی جانب سے بیان جاری کیا گیا ہے جس میں کہا گیا ہے کہ جیوری کی ساکھ اور غیر جانبداری پر سنجیدہ سوالات موجود ہیں کیونکہ پاکستان میں کئی مذاہب کے ماننے والے رہتے ہیں اور سب ایک ساتھ رہتے ہیں۔ تفصیلات کے مطابق ترجمان دفترخارجہ کے بیان کے مطابق پاکستان کی آبادی میں 4 فیصد مسیحی، ہندو، بدھ اورسکھ ہیں جبکہ اقلیتوں سے مساوی سلوک اورحقوق کی فراہمی ملکی آئین کی اساس ہے۔ اقلیتوں کوقانون سازی کے عمل میں شریک کرنے کے لیے مخصوص نشستیں بھی رکھی گئی ہیں ساتھ ہی اقلیتوں کے مذہبی مقامات اور جائدادوں کے تحفظ کے لیے عدلیہ نے تاریخی فیصلے بھی کیے ہیں۔ ترجمان دفترخارجہ کے مطابق امریکا کو اپنے ملک میں بڑھتے ہوئے اسلام فوبیا کی وجوہ تلاش کرنے کی ضرورت ہے۔ انسانی حقوق کے عالمی علمبرداروں کو کشمیرمیں خلاف ورزیاں نظرنہیں آرہیں، پاکستان کو کسی ملک سے اقلیتوں کے تحفظ کا درس دیئے جانے کی ضرورت نہیں۔
