اسلام آباد: سینیٹر رضاربانی نے سینیٹ اجلاس کے دوران اظہار خیال کرتے ہوئے کہا ہے کہ ملک کی خارجہ پالیسی راول پنڈی سے پارلیمنٹ میں منتقل کی جائے۔ انہوں نے کہا کہ احتساب ہوا تو عدلیہ، انتظامیہ اور ملٹری بیورو کریسی کا بھی ہوگا۔ ذرائع کے مطابق پیپلز پارٹی کے رہنما اور سینیٹر رضا ربانی نے کہا کہ ہم دیکھ رہے ہیں کہ پارلیمان کو ڈس فنکشنل کیا جارہا ہے۔ گزشتہ روز وزیر خارجہ نے کہا کہ کچھ ایسی چیزیں ہیں جو نہیں بتائی جا سکتیں، ایسی کون سی چیزیں ہیں جو پارلیمان کو نہیں بتائی جا سکتیں۔ رضا ربانی کا کہنا تھا کہ اگر حساس چیزیں ہیں تو ان کیمرا اجلاس بلا لیں، قومی سلامتی سے متعلق پارلیمانی کمیٹی فوری تشکیل دی جائے۔
رہنما پیپلز پارٹی کا کہنا تھا کہ پارلیمان تمام ریاستی اداروں کی ماں ہے۔ تاحال این ایف سی ایوارڈ جاری نہیں کیا گیا، لاپتا افراد کا معاملہ معمول بنتا جا رہا ہے۔ ریاست خطرناک کھیل کھیل رہی ہے۔ ریاست کو کچھ ہوا تو ہم میں سے کوئی نہیں بچے گا۔ بدقسمتی سے ریاست کے تینوں اداروں کے درمیان ہم آہنگی اور اختیارات کا توازن موجود نہیں۔ ہر ادارہ دوسرے کے اختیارات میں مداخلت کر رہا ہے ۔ رضا ربانی نے کہا کہ آج قانون ایک ہے لیکن اطلاق چار ہیں۔ انہوں نے کہا کہ سلیکٹو احتساب قبول نہیں۔ احتساب ہوگا تو عدلیہ، انتظامیہ اور ملٹری بیورو کریسی کا بھی ہوگا۔ وفاقی احتساب کمیشن بنایا جائے اور ملک کی سیاسی جماعتوں کو توڑنے سے اجتناب کیا جائے۔ انہوں نے عام شہریوں کے ساتھ زیادتیوں پر بھی کمیشن تشکیل دینے کامطالبہ کیا۔
