’’سندھ میں پی ٹی آئی کی حکومت‘ عوام تیار رہیں‘‘

کراچی:  تحریک انصاف کے رہنما اور رکن سندھ اسمبلی خرم شیر زمان نے دعویٰ کیا ہے کہ تحریک انصاف سندھ میں حکومت بنانے جا رہی ہے، عوام تیاری کرلے۔ ذرائع کے مطابق سندھ اسمبلی کے باہر میڈیا نمائندوں سے بات چیت کرتے ہوئے خرم شیر زمان کا کہنا تھا کہ سندھ حکومت بدعنوانی پر خاموش رہی، ان کا کام صرف کرپشن تھا، تاہم جے آئی ٹی کی رپورٹ آنے کے بعد سندھ حکومت کے پاس اب حکمرانی کا جواز ختم ہو چکا ہے۔ انہوں نے کہا کہ پی ٹی آئی مراد علی شاہ سے استعفے کا مطالبہ کرتی ہے۔

دوسری جانب تحریک انصاف کے رکن صوبائی اسمبلی حلیم عادل شیخ نے کہا کہ مرادعلی شاہ کو استعفا دینا پڑے گا۔ وزیر اعلیٰ سندھ نے جتنا رحم کیا اومنی گروپ پر کیا۔ سندھ بینک سے اربوں روپے کا قرضہ لیا جو مراد علی شاہ کے پاس ہے۔  ساڑھے 7 ارب کی کسانوں کو دی جانے والی سبسڈی بھی اومنی گروپ میں آگئی۔ انہوں نے مطالبہ کیا کہ ،پچھلے 10 سال کا فارنزک آڈٹ ہونا چاہیے، اس سے زیادہ کرپشن نکلے گی۔  ان سب کے بینک اکاؤنٹ سیز اور اثاثے منجمد ہونے چاہییں۔