نواز شریف کی نیب عدالت کے فیصلے کیخلاف اپیل دائر

اسلام آباد:  مسلم لیگ ن کے قائد نواز شریف نے نیب عدالت کی جانب سے العزیزیہ ریفرنس کیس میں سزا کے خلاف ہائی کورٹ میں اپیل دائر کردی ہے۔ ذرائع کے مطابق سابق وزیرا عظم کی جانب سے ان کے وکلا نے احتساب عدالت کے فیصلے کو اسلام آباد کی ہائی کورٹ میں چیلنج کیا ہے۔

نجی ٹی وی کے مطابق دائر کی گئی اپیل میں استدعا کی گئی ہے کہ نیب عدالت کی جانب سے دی گئی سزا کالعدم قرار دی جائے۔ قبلا زیں نواز شریف کو ایون فیلڈ ریفرنس میں بھی سزا ہو چکی ہے جس کے خلاف بھی اسلام آباد ہائی کورٹ ہی میں اپیل زیر سماعت ہے۔ واضح رہے کہ اسلام آباد کی احتساب عدالت نے 24 دسمبر کو سابق وزیر اعظم نواز شریف کو العزیزیہ ریفرنس میں 7 سال قید کی سزا سنائی تھی۔  131 صفحات پر مشتمل تفصیلی فیصلے میں کہا گیا تھا کہ نواز شریف العزیزیہ اور ہل میٹل کے اصل مالک ثابت ہوئے ہیں جبکہ وہ اثاثوں کے لیے جائز ذرائع آمدن بتانے میں ناکام رہے ۔