پارلیمان پر کلمہ لکھا ہے مگر اس کی حکمرانی نہیں‘ سراج الحق
لاہور: سابق امیر جماعت اسلامی قاضی حسین احمد کے یوم پر لاہور کے الحمرا آرٹ کونسل میں نایاب تصاویر کی نمائش کا اہتمام کیا گیا جس سے خطاب کرتے ہوئے امیر جماعت اسلامی پاکستان سینیٹر سراج الحق نے کہا ہے کہ ملک کو خیرات چندہ مانگنے والی نہیں بلکہ نظریاتی قیادت کی ضرورت ہے ۔ ذرائع کے مطابق سینیٹر سراج الحق نے کہا کہ ملک میں اسلامی نظام چاہتے ہیں۔ حکمرانوں نے ملک کے جغرافیہ اور نظریئے سے غداری اور بے وفائی کی ہے ، پارلیمنٹ پر کلمہ تو لکھا ہے لیکن اس کلمے کی حکمرانی نہیں ہے۔ قاضی حسین احمد نے طبقاتی نظام کے خلاف جدوجہد کی۔ آج عزم کریں کہ اپنی زندگی اور ملک کو اسلامی نظام کا گہوارا بنانے کے لیے صرف کریں گے ۔ انہوں نے کہا کہ آج بھی ملک کی حالت پہلے جیسی ہے ، قوم خوشی کی تلاش میں ووٹ دیتی ہے لیکن صرف چہرے تبدیل ہوتے ہیں اور نظام وہی رہتا ہے ، ملک کے مظلوم و مجبور لوگوں کو اکٹھا کرنا ہوگا۔ ان کا یہ بھی کہنا تھا کہ ملک میں ظالم جاگیردار اور کرپٹ سرمایہ داروں کا مخصوص ٹولہ ہے جو صرف اپنے مفادات کےلئے کام کرتے ہیں۔ سراج الحق نے مزید کہا کہ حکمران کبھی ایک ملک سے خیرات کبھی دوسرے سے چندہ مانگتے ہیں اور کبھی تیسرے کے دروازے پر حاضری دیتے ہیں۔ ملک اور عالم اسلام کو نظریاتی قیادت کی ضرورت ہے ، ایسی قیادت چاہیے جس کی نظر امریکہ اور آئی ایم ایف پر نہیں بلکہ اللہ پر ہو۔
