پاکستان نے ہند کو شکست دیکر سہ ملکی کبڈی ٹورنامنٹ جیت لیا

لاہور: پاکستان گرین نے سہ ملکی کبڈی ٹورنامنٹ کے فائنل میں ہند کو شکست دے کر میدان مار لیا۔ سینیئر صوبائی وزیرعبدالعلیم خان نے فاتح ٹیم کو ٹرافی پیش کی۔ تیسری پوزیشن کے میچ میں پاکستان وائٹس نے ایران کو ہرایا، دونوں مقابلوں میں شائقین نے بھرپور لطف اٹھایا اور اس ثقافتی کھیل کی ترقی کیلئے دل کھول کر داد دی۔3 ملکی انٹرنیشنل کبڈی ٹورنامنٹ کے فائنل کا میدان لاہور کے پنجاب اسٹیڈیم میں سجایا گیا تھا جس میں پاکستان گرین اور ہند کی ٹیموں میں ٹائٹل کیلئے مقابلہ ہوا۔کھلاڑیوں نے داو پیچ، پھرتی اور زور آزمائی کا شاندار مظاہرہ کرتے ہوئے شائقین سے خوب داد سمیٹی ۔شائقین نے دونوں ٹیموں کے کھلاڑیوں کی پذیرائی کی۔پاکستان گرین نے ہندوستانی حریفوں کو 29 کے مقابلے میں 40 پوائنٹس سے ہرا کر فائنل ٹرافی اپنے نام کی،ٹورنامنٹ میں تیسری پوزیشن کے مقابلے کیلئے پاکستان وائٹ نے ایرانی ٹیم کے کھلاڑیوں کو شکست دی۔فائنل مقابلے کے بعد سینیئر صوبائی وزیرعبدالعلیم خان اور وزیر کھیل رائے تیمور بھٹی نے فاتح ٹیم کو ٹرافی اور کھلاڑیوںمیںانعامات تقسیم کئے۔

 کھیلوں کی مزید خبریں اور تبصرے پڑھنے کیلئے واٹس ایپ گروپ میں"اردو نیوز اسپورٹس"جوائن کریں