انکم سپورٹ کا فائدہ اٹھانے والے افسران

بے نظیر انکم سپورٹ (بی آئی ایس پی) پروگرام سے نکالے جانے والے افراد کی مزید تفصیلات سامنے آئی ہیں۔

سرکاری دستاویز کے مطابق چاروں صوبوں اور وفاق سے اعلیٰ سرکاری افسران بھی بے نظیر انکم سپورٹ پروگرام سے فائدہ اٹھانے والوں میں شامل رہے ہیں۔

گریڈ 17 سے گریڈ 21 کے 2 ہزار 543 افسران کو لسٹ سے نکالا گیا ہے جن میں متعدد اعلیٰ سرکاری افسران  اپنی بیویوں کے نام پر پیسے وصول کرتے رہے ہیں۔

 سرکاری دستاویز کے مطابق بلوچستان میں سب سے زیادہ سرکاری افسران بے نظیر انکم سپورٹ پروگرام سے مستفید ہوئے ہیں۔

بلوچستان سے 741 سرکاری افسران بے نظیر انکم سپورٹ پروگرام سے بے دخل کیے گئے ہیں۔

اسی طرح  گریڈ 21 کے تین افسران بھی غریبوں اور مسحق افراد کی فہرست میں شامل تھے جن میں سے دو کا تعلق بلوچستان جبکہ ایک وفاق کا سرکاری ملازم تھا۔

ملک بھر سے گریڈ 20 کے 59 افسران سہہ ماہی وظیفہ وصول کرتے رہے۔ لسٹ سے نکالے گئے گریڈ 19 کے افسران کی تعداد 429 ہے۔ سندھ میں گریڈ 18 کے 342 افسران نے بے نظیر انکم سپورٹ پروگرام سے فائدہ اٹھایا۔

بے نظیر انکم سپورٹ پروگرام کے ذمہ داروں میں سے بھی 6 افسران وظیفہ حاصل کرتے رہے تھے۔

گریڈ 17 کے ایک ہزار 240 افسران نے بھی بینظیر انکم سپورٹ پروگرام سے فائدہ اٹھایا ہے۔

خیال رہے کہ بے نظیر انکم سپورٹ پروگرام کے تحت نادر اور مستحق افراد کے لیے حکومت کی جانب سے سہہ ماہی وظیفہ فراہم کیا جاتا ہے۔

حکام کے مطابق سرکاری افسران کے خلاف محکمانہ کارروائی بھی عمل میں لائی جائے گی۔

حال ہی میں بے نظیر انکم سپورٹ پروگرام سے 8 لاکھ سے زائد افراد کو وظیفہ حاصل کرنے والی فہرست سے نکالا گیا تھا۔ بے نظیر انکم سپورٹ پروگرام کی چیئر پرسن ڈاکٹر ثانیہ نشتر کے مطابق زیورات اور گاڑیاں والے بھی حکومتی وظیفہ حاصل کرنے والوں میں شامل تھے۔

• واٹس ایپ پر پاکستان کی خبروں کے لیے ’اردو نیوز‘ گروپ جوائن کریں