بیٹی کو ٹرین سے بچانے والے باپ پر جرمانہ 

مصر میں بیٹی کو ٹرین سے بچانے کے لیے جان پر کھیل جانے والے باپ پر ریلوے نے جرمانہ عائد کیا ہے۔

المرصد ویب سائٹ کے مطابق مصری ریلوے انتظامیہ نے سوشل میڈیا پر وائرل ہونے والی وڈیو کے بعد بچی کے باپ پر پچاس مصری پونڈ جرمانہ کردیا۔

الیوم السابع کے مطابق ریلوے انتظامیہ نے موقف اختیار کیا ’مصری شہری نے یہ حرکت کرکے نہ صرف یہ کہ اپنی بلکہ دوسروں کی زندگی کو بھی خطرات سے دوچار کردیا‘۔

’اسے مال گاڑی والے پلیٹ فارم سے مسافر ٹرین کے پلیٹ فارم جانے کے لیے انڈر پاس استعمال کرنا چاہئے تھا۔ اس کے بجائے مال گاڑی کے نیچے سے گزر کر مسافر ٹرین تک پہنچا‘۔

مصری اخبار کے مطابق ریلوے اتھارٹی کے انجنیئرز کی کمیٹی نے الا سماعیلیہ ریلوے سٹیشن کا دورہ کیا۔ پلیٹ فارموں کا معائنہ بھی کیا ہے۔ 

کمیٹی کے ارکان نے واقعہ کی تفصیلات جاننے کے لیے سی سی ٹی وی کیمروں کا ریکارڈ بھی چیک کیا ہے۔

 یاد رہے کہ ریلوے سٹیشن پر ٹرین پلیٹ فارم پر آنے ہی والی تھی کہ اچانک ایک بچی پلیٹ فارم سے ریلوے لائن کے قریب جاگری۔ والد نے یہ منظر دیکھ کر اپنی بیٹی کو ٹرین کی زد میں آنے سے بچانے کے لیے ریلوے لائن پر چھلانگ لگادی تھی ۔

باپ اپنی بچی کو آغوش میں لے کر ریلوے لائن کے قریب ہی لیٹ گیا۔

ریلوے لائن سے ٹرین دو منٹ تک گزرتی رہی۔ اس دوران سٹیشن پر موجود لوگ دم بخود تھے۔ ہر ایک سلامتی کے لیے دعا کرتا رہا۔

جیسے ہی ٹرین گزی اور دونوں بحفاظت نظر آئے تو پلیٹ فارم پر موجود لوگ خوشی سے چیخنے لگے۔ ہر ایک نے باپ بیٹی کو پرجوش انداز میں مبارکباد پیش کی۔

اس واقعے کی وڈیو کلپ مصری ذرائع ابلاغ میں وائرل ہوگیا۔ ہر ایک نے بچی کے باپ کے اقدام کی تعریف کی اور کہا اگر وہ بروقت اقدام نہ کرتا تو ٹرین سے چند ملی میٹر کے فاصلے پر گری ہوئی بچی جان سے ہاتھ دھو سکتی تھی۔