دنیا کے واحد سفید مادہ زرافے کا شکار

شمالی افریقی کے ملک کینیا میں شکاریوں نے دنیا کے واحد مادہ سفید زرافے اور اس کی بچھیا کا شکار کیا ہے۔

جانوروں کے تحفظ کے لیے کام کرنے والی تنظیموں کا کہنا ہے کہ اس شکار سے سفید زرافے کی نسل کو بچانے کی کوششوں کو ناقابل تلافی نقصان پہنچا ہے۔

خیال رہے کہ سفید زرافہ کینیا کے علاوہ دنیا بھر میں اور کہیں نہیں پاتا جاتا۔

جانوروں کے تحفظ کے لیے کام کرنے والی تنظیموں کے مطابق پولیس کو مادہ زرافے اور اس کے بچے کی ہڈیوں کی باقیات شمال مشرقی کینیا کی گریسا کاؤنٹی سے ملیں۔ یہ تلاش ماں اور بچے کے لاپتا ہونے کے بعد کی گئی تھی۔

اب اس نوعیت کا صرف ایک زرافہ بچا ہے جو کہ شکار کیے جانے والے زرافہ کا ہی بچہ ہے۔ یہ زرافہ  تنزانیہ میں ہے اور اب دنیا بھر میں پایا جانے والا واحد سفید زرافہ ہے۔

اسحاق بنی ہیرولا کمیونٹی کنزروینسی  کے ایک بیان کے مطابق زرافے کے شکار سے اس نسل کو بچانے کے لیے کمیونٹی کی بھرپور کوششوں کو شدید دھچکا لگا ہے۔

2017 میں جب سفید زرافے کو کنزروینسی میں دیکھا گیا تو دنیا بھر کے جانوروں کے تحفظ کے لیے کام کرنے والی تنظیموں میں بہت زیادہ جوش و خروش پیدا ہوا تھا۔ گذشتہ سال اگست میں جب اس زرافے نے دو بچھڑوں کو جنم دیا تو بھی ان تنظیموں نے خوشی کا اظہار کیا تھا۔

اسحاق بنی ہیرولا کمیونٹی کنزروینسی کے مینیجر محمد احمد نور کے مطابق یہ ان کی زندگی کا دکھ بھرا دن ہے۔

ماہرین کا کہنا ہے کہ یہ نایاب زرافے ایک جینیاتی بگاڑ لیوک ازم کا شکار تھے۔ اس بیماری میں خلیوں میں موجود رنگ دینے والے پگمنٹس کم ہو جاتے ہیں۔

یہ بیماری البانزم (یا برص) سے مختلف ہے، ایک مرض جسم کو جزوی طور پر سفید کرتا ہے جبکہ دوسرا جسم کو مکمل طور پر سفید کردیتا ہے۔ اس کی الٹ بیماری میلینزم کی ہے جس میں رنگ دینے والے پگمنٹس نہایت فعال ہوتے ہیں اور جانور کا جسم مکمل سیاہ ہوجاتا ہے۔