کورونا سے ہلاکتوں کی تعداد 411 تک پہنچ گئی (فوٹو، سوشل میڈیا)
سعودی عرب میں کورونا کے نئے کیسز میں نمایاں کمی ہونا شروع ہوگئی ۔ گزشتہ 24 گھنٹے کے دوران مملکت کے مختلف شہروں میں ایک ہزار 931 افراد میں کووڈ 19 وائرس کی تصدیق ہوئی ہے۔
وزارت صحت کے ترجمان ڈاکٹر محمد العبدالعالی نے یومیہ پریس کانفرنس میں بتایا کہ سعودی عرب میں اب تک کورونا کے مجموعی مریضوں کی تعداد 76 ہزار 726 ہو گئی ہے۔
ریاض میں کووڈ 19 کے سب سے زیادہ مریضوں کی تصدیق ہوئی (فوٹو، واس )
سعودی خبررساں ایجنسی ’ایس پی اے ‘ کے مطابق منگل 26 مئی کو وزارت صحت کی جانب سے جاری اعداد وشمار کے مطابق گزشتہ 24 گھنٹے کے دوران کورونا سے 12 افراد ہلاک ہوئے جس کے ساتھ ہی مجموعی ہلاکتوں کی تعداد 411 تک پہنچ گئی۔
کورونا سے صحتیاب ہونے والوں کی تعداد میں بھی خاطر خواہ اضافہ ہوا ہے ، ایک دن میں 2 ہزار 782 افراد نے اس وبائی مرض کو شکست دی جس کے بعد اب تک کورونا سے مجموعی طور پر 48 ہزار 450 افراد صحتیاب ہو چکے ہیں۔
وزارت صحت کی جانب سے سعودی عرب کے مختلف شہروں میں کورونا کے مصدقہ کیسز میں ریاض میں آج بھی سب سے زیادہ مریضوں کی تصدیق ہوئی جن کی تعداد 789 رہی جبکہ جدہ میں 327 ، الھفوف میں 166 ، دمام ، 143 ، مکہ مکرمہ 120 ، بریدہ 97 ، الجبیل 37 ، قطیف 31 ، الخبر 26 ، تبوک 17 ، طائف 13 ، مدینہ منورہ 12 ، بیش 10 ، الظھران 10 ، الخرج اور السحن میں 9 ، منفذ الحدیثہ 7، الجفر 6 ، جبکہ دیگر شہروں میں مریضوں کی تعداد 5 اور اس سے کم رہی ۔
ترجمان وزارت صحت کا کہنا ہے کہ گزشتہ 24 گھنٹے میں ہونے والی امواد میں 3 سعودی اور 9 غیر ملکی شامل ہیں، امواد دمام، مکہ ، مدینہ منورہ ، جدہ اور طائف میں ہوئیں۔
مریضوں میں 55 فیصد غیر ملکی شامل ہیں (فوٹو، ایس پی اے )
کووڈ 19 سے ہلاک ہونے والوں کی عمریں 45 سے 76 برس کے درمیان تھیں جو کورونا سے علاوہ دیگر مہلک امراض کا بھی شکارتھے۔
وزارت صحت کا کہنا ہے کہ کورونا کے نئے کیسز میں 45 فیصد سعودی جبکہ 55 فیصد غیر ملکی جبکہ 25 فیصد خواتین ، 75 فیصد مرد، 11 فیصد بچے اور 4 فیصد معمر افراد شامل ہیں
