گزشتہ برس سے فروغ سیاحت کےلیے خصوصی ویزوں کا اجرا کیا گیا تھا(فوٹو، سوشل میڈیا)
سعودی ڈائریکٹریٹ جنرل آف پاسپورٹ اینڈ امیگریشن ’جوازات‘ کی جانب سے مملکت میں موجود سیاحتی ویزوں پر مقیم غیر ملکیوں کے ویزوں میں تین ماہ کے لیے خود کار توسیع کردی گئی ہے.
جوازات کی جانب سے جاری اعلامیہ میں کہا گیا ہے کہ ’سیاحتی ویزے پر آنے والے سیاح جو کورونا وائرس کی وجہ سے بین الاقوامی پروازوں پر عائد کی جانے والی پابندی کے باعث مملکت سے روانہ نہیں ہو سکے ان کے ویزوں کی مدت میں بغیر کسی فیس کے 3 ماہ کی توسیع کردی گئی ہے‘.
سیاحتی ویزوں کی خودکار توسیع پرفیس نہیں لی جائے گی (فوٹو،سوشل میڈیا)
سعودی خبررساں ایجنسی ’ایس پی اے ‘ کے مطابق ڈائریکٹریٹ جنرل جوازات کا کہنا ہے کہ ’سیاحتی ویزے پر آنے والے وہ افراد جو مملکت میں مقیم ہیں اور واپس نہ جاسکے انہیں اپنے ویزوں میں توسیع کے لیے جوازات سے رجوع کرنے کی ضرورت نہیں کیونکہ انکے ویزوں میں خودکار طور پر توسیع کردی جائے گی.
جوازات کا کہنا ہے کہ سیاحتی ویزوں میں خودکار توسیع قومی ادارہ معلومات کے تعاون سے کی جائے گی. قومی ادارہ معلومات موجودہ ڈیٹا کے حوالے سے ویزوں کی توسیع کا کام مرحلہ وار کرے گا جس سے ان لوگوں کو سہولت ہو گی جو سیاحتی ویزے پر آئے ہوئے ہیں.
یاد رہے سعودی عرب میں فروغ سیاحت کےلیے گزشتہ برس جامع نظام مرتب کیا گیا تھا جس کے تحت مختلف ممالک کےشہریوں کو آن آرائیول بھی سیاحتی ویزوں کا اجرا شامل ہے.
واضح رہے مملکت میں کورونا وائرس کے بعد مارچ کے دوسرے ہفتے سے پروازوں پر مرحلہ وار پابندی عائد کردی گئی تھی جس کی وجہ سے سعودی عرب سے جانے والے اور یہاں آنے والی پروازوں پر پابندی لگا دی گئی تھی.
سعودی حکومت نے اپنے شہریوں کو واپس لانے کےلیے مرحلہ وار خصوصی پروازیں جاری کی ہوئی ہیں جن کا سلسلہ ابھی تک جاری ہے.
دوسری جانب پروازوں پر عائد کی جانے والی پابندی کی وجہ سے سعودی حکومت کی جانب سے مملکت میں مقیم ایسے غیر ملکی جو اپنے وطن جانا چاہتے ہیں کی واپس کے لیے خصوصی منصوبہ بھی جاری ہے جسے ’عودہ‘ کا نام دیا گیا ہے.
کورونا کی وجہ سے اندرون اور بیرون ملک سفرپر پابندی عائد کی گئی تھی (فوٹو، سوشل میڈیا)
منصوبے کے تحت وطن جانے کے خواہشمند اپنی انٹری کراتے ہیں جیسے ہی مخصوص ملک کے افراد کی مطلوبہ تعداد جمع ہوجاتی ہے اس ملک کی متعلقہ وزارت سے رابطہ کرکے وہاں کےلیے پرواز کا بندوبست کردیاجاتاہے.
