خصوصی پروازوں کے ذریعے 280 پاکستانیوں کی وطن واپسی
خصوصی پروازوں کے ذریعے 280 پاکستانیوں کی وطن واپسی
جمعرات 11 جون 2020 19:39
مئی سے پاکستانیوں کی واپسی کا آپریشن شروع کیا گیا (فوٹو، پاکستان قونصلیٹ)
پاکستان انٹرنیشنل ایئرلائن (پی آئی اے) کی مزید دو خصوصی پروازیں جدہ سے 280 مسافروں کو لے کر پاکستان روانہ ہوگئی ہیں۔ حکومت پاکستان کی جانب سے مختلف ممالک سے پاکستانیوں کی واپسی کے سلسلے میں فلائیٹ آپریشن جاری ہے۔
جدہ سے ملتان جانے والی پہلی پرواز پی کے 9736 کے ذریعے 140 مسافروں کو لے کر صبح 8:30 پر جدہ سے روانہ ہوئی جبکہ دوسری پرواز پی کے 9740 بھی ملتان کے لیے ہی تھی جس میں سوار مسافروں کی تعداد 140 ہی تھی ۔ دوسری فلائٹ پہلی پرواز کے 2 گھنٹے بعد روانہ ہوئی۔
خصوصی پروازوں کی واپسی کا سلسلہ جاری ہے(فوٹو، پاکستان قونصلیٹ)
مسافروں کو ایئرپورٹ پر الوداع کہنے کےلیے قونصل جنرل کی نمائندگی کرتے ہوئے ڈپٹی قونصل جنرل شائق احمد بھٹو، پریس قونصل محمد ارشد منیر اور قونصل ویلفیئر ماجد میمن قونصل جنرل جدہ کی نمائندگی کرتے ہوئے ائیرپورٹ پر موجود تھے۔
یاد رہے کورونا کی وبا پھیلنے کے باعث معمول کی بین الاقوامی پروازوں کی معطلی کے بعد حکومت پاکستان نے سعودی عرب سمیت مختلف ممالک میں پھنسے ہوئے پاکستانیوں کو وطن واپس لانے کے لیے پی آئی اے کی خصوصی پروازوں کا آغاز کیا۔
مئی 2020 سے پی آئی اے کی خصوصی پروازوں کے آغاز سے اب تک 14 پروازوں کے ذریعے 2750 سے زائد پاکستانی جدہ سے وطن واپس پہنچ چکے ہیں۔
ریاض میں سفارت خانہ پاکستان اور جدہ میں قونصلیٹ ، پی آئی اے کے تعاون سے ان خصوصی پروازوں کے انتظامات کا جائزہ لے رہے ہیں۔
