کنٹرول لائن پر انڈین فوج کی فائرنگ ، چارشہری ہلاک

 کنٹرول لائن پر انڈین فوج کی فائرنگ سے ایک خاتون سمیت چار شہری ہلاک ہوگئے۔

فوج کے شعبہ تعلقات عامہ آئی ایس پی آر سے جاری بیان کے مطابق انڈین فوج نے کنٹرول لائن کے ساتھ  نکیال اور باگسر سیکٹرز میں شہری آبادی کو نشانہ بنانے کے لیے بلا اشتعال فائرنگ کی ہے۔

 بیان کے مطابق فائرنگ سے رتہ جبار اور لیوانہ کھیتر گاوں میں خاتون سمیت چار افراد ہلاک اور ایک شہری زخمی ہوگیا۔

 آئی ایس پی آر نے بیان میں مزید کہا کہ پاک فوج کے اہلکاروں نے انڈین  فائرنگ کا موثر جواب دیا ہے تاہم اس کی تفصیل نہیں بتائی گئی۔

اے ایف پی نے پاکستان آرمی اور مقامی حکام کے حوالے سے بتایا کہ کنٹرول لائن پرانڈین فوج کی شیلنگ سے چار افرد ہلاک ہوئے ہیں۔

میجر جنرل بابر افتخار نے ٹوئٹر پر بتایا کہ ’ انڈین فوج نے متنازع علاقے میں سیز فائر کی خلاف ورزی کی جس سے معصوم شہریوں کا جانی نقصان ہوا ہے‘۔

مقامی حکا م نے اے ایف پی کو بتایا کنٹرول لائن کے ساتھ دو دیہات میں توپخانے کے گولے گرے جس سے ہلاکتیں ہوئی ہیں۔

انڈین وزارت خارجہ نے فوری طور پر اس واقعہ پر کوئی بیان جاری نہیں کیا ہے۔

پچھلے برس 5 اگست کو انڈیا کے زیر کنٹرول کشمیر کی خصوصی حیثیت ختم کیے جانے کے بعد سے پاکستان اور انڈیا کے درمیان کنٹرول لائن پر کشیدگی بڑھ گئی ہے۔

کنٹرول لائن پر شیلنگ اور فائرنگ کا تبادلہ معمول بنتا جا رہا ہے۔

 لائن آف کنٹرول پر فضائی حدود کی خلاف ورزی کی خلاف ورزی کے واقعات بھی پیش آرہے ہیں۔

 آئی ایس پی آر کے مطابق پاک فوج کی جانب سے اس سال کنٹرول لائن پر پاکستانی حدود میں اب تک  انڈیا کے آٹھ  کواڈ کاپٹر مار گرائے جا چکے ہیں۔

انڈیا کی طرف سے ان واقعات پر بھی کوئی ردعمل سامنے نہیں آیا ہے۔