حج کی اجازت کن افراد کو ملے گی؟

سعودی وزیر حج و عمرہ ڈاکٹر صالح محمد بنتن نے کہا ہے کہ صحت ضوابط پر پورا اترنے والے افراد کو ہی حج کی اجازت دی جائے گی-

سعودی چینل العربیہ سے گفتگو کرتے ہوئے وزیر حج و عمرہ ڈاکٹر صالح محمد بنتن نے کہا کہ ’حج  کے لیے سیکیورٹی فورس کے اہلکاروں اورفیلڈ میں کام کرنے والے صحت عملے کو ترجیح دی جائے گی۔‘

انہوں نے کہا کہ’ مختلف ممالک کے شہریوں اور تعداد کا تعین صحت شرائط و ضوابط کے تحت کیا جائے گا۔‘ 

 وزیرحج کا کہنا تھا ’اس سال ہر ایک کو حج کی اجازت نہیں ہوگی۔‘

 ایک سوال پر انہوں نے بتایا کہ’ وزارت صحت نے سفارتی مشنوں، سفارتخانوں اور ان ممالک کے حج اداروں کے ساتھ بات چیت کرکے حج کے لیے صحت ضوابط مقرر کیے ہیں- اس سال مختلف ممالک کے عازمین کو حج  پر بھیجا جائے گا جو صحت ضوابط پر پورے اترتے ہوں۔'

وزیر حج کے مطابق جہاں تک سعودیوں کا تعلق ہے ان کے زمرے متعین کردیے گئے ہیں۔ اس حوالے  سے ترجیح وزارت صحت کے فیلڈ عملے اور امن عامہ کے ان اہلکاروں کو دی جائے گی جنہوں نے کورونا وائرس سے بچاؤ کے حفاظتی اقدامات نافذ کرائے۔'

دوسری جانب حرمین جنرل پریذیڈنسی کے سربراہ نے بتایا کہ عازمین حج کے استقبال کی تیاریاں مکمل کرلی گئی ہیں۔مزید پڑھیں

دریں اثنا مسجد الحرام اور مسجد نبوی امور کی جنرل پریذیڈنسی نے مشاورتی کونسل کا اجلاس کیا۔ پریذیڈنسی کے سربراہ اعلی ڈاکٹر عبدالرحمن السدیس اور کونسل کے ارکان شریک ہوئے۔

سبق ویب سائٹ کے مطابق السدیس نے اجلاس میں کہا کہ’ شکر ہے کہ حالات معمول پر آرہے ہیں۔ لاک ڈاؤن ختم کردیا گیا ہے۔ حکومت نے وبا سے نمٹنے اور وائرس کو پھیلنے سے روکنے کے لیے مقامی شہریوں اور مقیم غیرملکیوں میں آگاہی مہم قابل قدر انداز میں چلائی۔‘

انہوں نے مزید کہا کہ’ ہمیں صحت و سلامتی کی خاطر اپنی یومیہ سرگرمیوں اور دفاتر میں حفاظتی اقدامات کی پابندی جاری رکھنا ہوگی‘۔

 خود کو اپ ڈیٹ رکھیں، واٹس ایپ گروپ جوائن کریں