اغوا برائے تاوان میں ملوث غیر ملکی گروہ گرفتار

سعو دی عرب میں ریاض ریجن میں پولیس نے اغوا برائے تاون میں ملوث 3 رکنی غیر ملکی گروہ کو گرفتار کیا ہے۔

سعودی خبررساں ایجنسی ’ایس پی اے ‘ کے مطابق ریجنل پولیس ترجمان کرنل شاکر التویجری نے بتایا کہ پولیس کو اطلاع ملی تھی کہ نامعلوم غیر ملکیوں نے کسی شخص کو یرغمال بناکر اپنے فلیٹ میں قید کررکھا ہے۔

کرنل التویجری نے مزید کہا کہ اطلاع میں مزید کہا گیا تھا کہ ملزمان نے اپنے ہموطن مغوی کے اہل خانہ سے بنگلہ دیش میں رابطہ کرکے ان سے تاوان کے طور پر 25 ہزار ریال طلب کیے ہیں۔ ملزمان نے مغوی کے اہل خانہ کو دھمکی بھی دی تھی کہ اگر تاوان ادا نہ کیا گیا تو وہ مغوی کو ہلاک کردیں گے۔

اغوا برائے تاوان کی اطلاع ملتے ہی پولیس نے انتہائی خفیہ اور سرعت سے کارروائی کرکے مغوی کو ملزمان کے قبضےسے رہا کرالیا۔ ملزمان نے ریاض سے علاقے ’لبن ‘ کے ایک فلیٹ میں مغوی کو رکھا ہوا تھا۔

گرفتار ملزمان کی تعداد 3 تھی، ان کا تعلق بنگلہ دیش سے ہے ۔عمریں 30 سے 40 کے برس کے درمیان تھیں۔

 ادھرپولیس کی چھاپہ مار ٹیم نے العمل محلے کے ایک مکان سے 17 بنگلہ دیشی جورایوں کو رنگے ہاتھوں گرفتار کرلیا ۔ ملزمان کے قبضے سے 20 ہزار ریال بھی برآمد ہوئے جو انہوں نے جوئے میں لگائے ہوئے۔

تمام ملزمان کے خلاف مقدمہ درج کرکے انہیں متعلقہ ادارے کے سپرد کردیا گیا۔