اٹلی:’پاکستانیوں کے لیے روزگار کے مواقع میں اضافہ ہو رہا‘

اٹلی میں تعینات پاکستان کے سفیر جوہر سلیم نے کہا ہے کہ کورونا کے باعث اٹلی کی مجموعی معیشت میں کمزوری کے باوجود یہاں مقیم پاکستانی زیادہ متاثر نہیں ہوئے بلکہ ہر گزرتے دن کے ساتھ ان کے لیے روزگار کے مواقع میں اضافہ ہو رہا ہے۔

اٹلی سے ورچوئل میڈیا بریفنگ کے دوران پاکستانی سفیر نے  پاکستانی اور اطالوی صحافیوں سے گفتگو کرتے ہوئے کہا کہ کورونا کے دوران اپنی کمیونٹی سے پوری طرح رابطے میں رہے اور بوقت ضرورت ان کی مدد بھی کی گئی۔

انھوں نے کہا کہ کورونا کے دوران بے روزگار یا جن کے کاروبار متاثر ہوئے اٹلی کی حکومت کی جانب سے ان کو خاطر خواہ تعاون ملا جس کی وجہ سے جون کے مہینے میں اٹلی سے پاکستانیوں کی ترسیلات زر میں 70 فیصد اضافہ ہوا۔

اس کے علاوہ انھوں نے کہا کہ پاکستان میں موجود وہ شہری جنھیں اٹلی واپس آنا تھا یا اٹلی سے واپس پاکستان جانا تھا ان کے لیے دو خصوصی پروازوں کا اہتمام کیا گیا جبکہ ایک پرواز تو یورپی یونین سے پابندی کے باوجود چلانے کی اجازت حاصل کی گئی تھی۔

دونوں ممالک کے درمیان باہمی تعلقات کے حوالے سے بات کرتے ہوئے پاکستانی سفیر نے کہا کہ اٹلی 2 ٹریلین ڈالرز کی جی ڈی پی کے ساتھ دنیا کی آٹھویں اور یورپی یونین کی تیسری بڑی معیشت ہے۔

پاکستان کی برآمدات سے مستفید ہونے والے ملکوں میں اٹلی نویں نمبر پر ہے۔ کورونا وائرس کی وجہ سے آئی ایم ایف نے اٹلی کی مجموعی پیداوار میں 9 سے گیارہ فیصد کمی کا امکان ظاہر کیا ہے ۔

انھوں نے بتایا کہ دو طرفہ تجارتی سرگرمیوں میں گزشتہ سال پاکستان کا اٹلی کے ساتھ تجارتی خسارہ 164 ملین ڈالر رہا جبکہ مالی سال 20-2019 میں لاک ڈاؤن کے باوجود پاکستان 210 ملین ڈالر سرپلس ہوگیا۔ جس میں پاکستان کی برآمدات 731 ملین ڈالر جبکہ اٹلی سے 521 ملین ڈالر کی درآمدات ہوئیں۔ گزشتہ سال جون میں اٹلی کی طرف سے پاکستان میں ہونے  والی سرمایہ کاری میں 45 فیصد اضافہ ہوا۔

جوہر سلیم نے کہا کہ  اٹلی قابل تجدید توانائی کے شعبوں میں بھی سرمایہ کاری میں دلچسپی رکھتا ہے ۔ گزشتہ مالی سال کے 111 ملین ڈالر کے مقابلے میں رواں مالی سال 29 فیصد کے اضافے کے ساتھ 142 اشاریہ نو ملین ڈالر ترسیلات زر رہے۔

ان کا کہنا تھا کہ دونوں ممالک کے درمیان معاشی تعاون کے فروغ کے لئے جوائنٹ اکانومک کمیشن اور دوطرفہ سیاسی کنسلٹیشن کا قیام عمل میں لایا گیا تھا۔ رواں سال کے آخری کوارٹر میں دونوں فورمز کی ملاقاتوں کا انعقاد کیا جائے گا۔ جوائنٹ اکنامک کمیشن کے تحت اٹلی سے ٹیکسٹائل، چمڑے اور ماربل کے شعبوں میں پاکستان کو تکنیکی معاونت فراہم کرنے کا امکان ہے۔