تین ویکسینز کے تجربات کر رہے ہیں: مودی

انڈیا کے وزیراعظم نریندر مودی نے کہا ہے کہ جیسے ہی سائنسدانوں نے منظوری دی ملک میں کورونا کی ویکسین کی بڑے پیمانے پر تیاری شروع کر دی جائے گی۔

خبر رساں ادارے روئٹرز کے مطابق انڈین وزیراعظم نے سنیچر کو یوم آزادی کی تقریب سے خطاب میں کہا کہ وہ ہر شہری کے لیے ملک گیر صحت کی سہولیات فراہم کرنے کا منصوبہ لائے ہیں۔

نریندر مودی نے صحت اور معیشت میں خودکفالت کو اپنی حکومت کی اولین ترجیحات میں سے قرار دیا۔

کورونا وائرس کے پھیلاؤ کی وجہ سے انڈیا کے یوم آزادی کی تقریبات کو محدود کیا گیا ہے۔

دہلی کے لال قلعے سے اپنے خطاب میں انڈیا کے وزیراعظم کا کہنا تھا کہ 'ایک، دو نہیں بلکہ ملک میں تین کورونا کی ویکسین کے تجربات کیے جا رہے ہیں۔'

روئٹرز کے مطابق نریندر مودی نے نارنجی اور سفید پگڑی پہنی ہوئی تھی اور تقریب کے دوران جب بھی کوئی ان کے قریب آتا تو وہ اسی رنگ کے ایک رومال سے اپنے منہ اور ناک کو ڈھانپ لیتے۔

انڈین وزیراعظم نے کہا کہ 'ویکسین کی بڑے پیمانے پر تیاری کے ساتھ اس کو ہر شہری تک کم سے کم وقت میں پہنچانے کے لیے بھی روڈ میپ تیار ہے۔' 

انڈیا کی ایک ارب 30 کروڑ آبادی کے لیے 'نیشنل ڈیجیٹل ہیلتھ مشن' کا افتتاح کرتے ہوئے نریندر مودی نے کہا کہ اب ایک ہیلتھ آئی ڈی یا کارڈ کے تحت کسی بھی شہری کی بیماری، ٹیسٹ، ادویات اور صحت کا مکمل ریکارڈ رکھا جائے گا۔

انڈین وزیراعظم کا کہنا تھا کہ 'علاج میں درپیش چیلنجز کو اب ٹیکنالوجی کے ذریعے بہتر طریقے سے کم کیا جا سکے گا۔ اب ڈاکٹر سے وقت لینا ہو، علاج کے لیے رقم جمع کرانی ہو یا ہسپتال میں دستاویزات تیار کرنے کی بھاگ دوڑ ہو، یہ مشن ان تمام رکاوٹوں کو ختم کرنے میں مدد دے گا۔'

واضح رہے کہ عالمی وبا کورونا وائرس نے انڈیا کی آبادی کے ایک بڑے حصے کو متاثر کیا ہے اور ملک میں معیشت کی رفتار سست ہوئی ہے۔ انڈیا میں کورونا کے 24 لاکھ مریض سامنے آ چکے ہیں جن میں سے بیشتر صحت یاب ہوئے۔