کورونا کیسز میں دوسرے دن بھی ریکارڈ کمی

سعودی عرب میں کورونا وائرس کے نئے کیسز میں پیر کو دوسرے دن بھی اپریل کے بعد اب تک کی ریکارڈ کمی ہوئی ہے اور گذشتہ 24 گھنٹوں کے دوران 400 سے کم مریض سامنے آئے ہیں۔

وزارت صحت کے مطابق پیر 16 نومبر کو گذشتہ 24 گھنٹوں کے دوران 301 نئے مریضوں کی تصدیق ہوئی ہے۔ 'اس طرح ملک میں متاثرین کی تعداد بڑھ کر تین لاکھ 53 ہزار 556 ہو گئی ہے۔‘

سبق نیوز نے وزارت صحت کی جانب سے جاری اعداد و شمار کے حوالے سے بتایا کہ ’گذشتہ 24 گھنٹوں کے دوران 364 افراد صحت یاب ہوئے ہیں۔ اب تک تین لاکھ 40 ہزار 668 افراد اس مرض سے شفایاب ہو چکے ہیں۔'

’مملکت میں اس وقت ایکٹیو کیسز کی تعداد کم ہو کر سات ہزار 212 رہ گئی ہے جن میں سے 823 مریض انتہائی نگہداشت یونٹ میں زیرعلاج ہیں۔‘

 وزارت صحت کا کہنا ہے کہ ’گذشتہ روز کورونا سے 19 افراد ہلاک ہوئے۔ اس طرح مملکت میں اموات کی مجموعی تعداد پانچ ہزار 667 ہو چکی ہے۔‘

گذشتہ 24 گھنٹوں کے دوران مختلف شہروں میں کورونا وائرس کے نئے کیسز کی سب سے زیادہ تعداد ریاض میں رہی جہاں 42 نئے مریض سامنے آئے ہیں۔

 بیان میں کہا گیا کہ حائل 31، ینبع 23، مکہ 23، مدینہ 15، خمیس مشیط 15، جدہ 12، الھفوف 7، العقیعق 7، بریدہ 7، دمام 5 اور الخبر میں 5 کیسز کا پتا چلا ہے۔

حالیہ اعداد و شمار کے مطابق 13 شہروں میں مریضوں کی تعداد ایک، ایک، 12 شہروں میں دو، دو اور 6 شہر میں تین، تین جبکہ 6 شہروں میں، چار، چار افراد میں کورونا وائرس کی تصدیق ہوئی ہے۔

سعودی عرب میں متعدی امراض سے بچاؤ اور وبا کو پھیلنے سے روکنے کے لیے حفاظتی اقدامات کا سلسلہ جاری ہے۔

وزارت صحت کا کہنا ہے کہ کورونا وائرس ختم نہیں ہوا۔ 'وہ افراد جو احتیاطی تدابیر پر عمل کرنے کے حوالے سے سنجیدگی اختیار نہیں کرتے انہیں چاہیے کہ وہ اس حوالے سے ذمہ داری کا ثبوت دیں۔'

ّسماجی فاصلے کے اصول کی پابندی کرتے ہوئے ایس او پیز کا مکمل خیال رکھیں تاکہ اس مہلک وائرس سے محفوظ رہا جاسکے۔ٗ