اس سال کسی کو بھی امتحان کے بغیر پروموٹ نہیں کیا جائے گا: شفقت محمود

وفاقی وزیر تعلیم شفقت محمود نے کہا ہے کہ رواں سال کسی کو بھی امتخان کے بغیر اگلی جماعت میں پروموٹ نہیں کیا جائے گا۔

شفقت محمود نے ٹوئٹر پر لکھا کہ ’ بورڈ کے تمام امتحانات مئی اور جون تک ملتوی کر دیے گئے ہیں۔ مجھے واضح کرنے دیں رواں سال کسی کو بھی امتحان کے بغیر اگلی جماعت میں پروموٹ نہیں کیا جائے گا۔‘

قبل ازیں اسلام آباد میں معاون خصوصی برائے صحت ڈاکٹر فیصل سلطان کے ساتھ پریس بریفنگ میں  شفقت محمود نے کہا تھا کہ 18 جنوری کو نویں، دسویں، گیارہویں اور بارہویں جماعت تک کے تعلیمی ادارے کھل جائیں گے۔

ان کا کہنا تھا کہ 25 جنوری سے پرائمری سے آٹھویں جماعت کے بچے بھی سکول آنا شروع کر دیں گے جبکہ یکم فروری سے ہائر ایجوکیشن کے تمام ادارے کھل جائیں گے۔

تعلیمی ادارے کھولنے سے متعلق فیصلہ وفاقی وزیر تعلیم شفقت محمود کی زیرصدارت بین الصوبائی وزرائے تعلیم کے اجلاس میں ہوا۔

وفاقی وزیر تعلیم کے مطابق مارچ میں ہونے والے بورڈ امتحانات اب مئی اور جون میں منعقد کیے جائیں گے۔

انہوں نے مزید کہا کہ بین الصوبائی وزارت تعلیم کا اجلاس 14 یا 15 جنوری کو دوبارہ طلب کیا جائے گا جس میں کورونا کیسز کی صورتحال کا جائزہ لینے کے بعد 18 جنوری سے تعلیمی اداروں کو کھولنے کی توثیق کی جائے گی۔

دوسری جانب صوبہ پنجاب نے نویں سے بارہویں جماعت تک تعلیمی ادارے 18 جنوری سے کھولنے کا فیصلہ کیا ہے۔  پنجاب میں پہلی سے آٹھویں جماعت تک تعلیمی ادارے 20 جنوری سے کھولنے کا فیصلہ کیا گیا ہے جبکہ پنجاب میں یکم فروری سے یونیورسٹیز کھولی جائیں گی۔

صوبہ خیبر پختونخوا نے بھی تعلیمی ادارے 18 جنوری سے مرحلہ وار کھولنے کا فیصلہ کیا ہے۔ 

معاون خصوصی برائے صحت ڈاکٹر فیصل سلطان نے کہا ہے کہ میڈیکل کالجز کے امتحانات کے حوالے سے منگل کو ایک اہم اجلاس ہوگا۔ 

کورونا وائرس کی دوسری لہر کے پیش نظر وفاقی حکومت نے ملک بھر کے تعلیمی ادارے 26 نومبر سے بند کیے تھے۔ اس دوران سکول، کالجز اور یونیورسٹیز میں گھر سے تعلیم کا سلسلہ جاری تھا۔

تعلیمی اداروں میں دسمبر میں ہونے والے امتحانات بھی ملتوی کر دیے گئے تھے۔