بیٹی کو مارنے کے لیے ’کرائے کے قاتلوں کو 50 ہزار ادا کرنے والی ماں گرفتار‘

انڈین ریاست اوڈیشہ میں ایک 58 سالہ خاتون کو گرفتار کیا گیا ہے جس پر الزام ہے کہ اس نے کرائے کے قاتلوں سے اپنی بیٹی کو قتل کر وایا۔

انڈین نیوز چینل این ڈی ٹی وی کے مطابق ’اس خاتون نے پرامود جینا نامی شخص اور اس کے ساتھیوں کو بیٹی کو قتل کرنے کے لیے 50 ہزار انڈین روپے دیے۔‘

پولیس اہلکار پرویش پال نے بتایا کہ پرامود جینا کو بھی گرفتار کر لیا گیا ہے۔

پولیس کے مطابق ابتدائی تفتیش میں سامنے آیا ہے کہ خاتون کی بیٹی مبینہ طور پر شراب کی فروخت کے کاروبار میں ملوث تھی جو دونوں کے درمیان کشیدگی کی وجہ تھی۔

ایک اور پولیس اہلکار نے کہا کہ خاتون نے اپنی بیٹی کو یہ کاروبار بند کرنے کا کہا لیکن اس نے بات نہیں مانی جس کے بعد خاتون نے کرائے کے قاتلوں کو 50 ہزار انڈین روپے دیے اور بیٹی کو قتل کروا دیا۔

پولیس کا کہنا ہے کہ خاتون نے قاتلوں آٹھ ہزار روپے ایڈوانس دیا۔

پولیس نے بتایا کہ خاتون کی بیٹی کو 12 جنوری کو پتھروں اور دیگر اشیا سے قتل کیا گیا اور اس کی لاش کو گاؤں کے باہر ایک پُل کے نیچے سے برآمد کیا گیا۔