ریستورانوں میں ٹیبل سروس اتوار سے بحال، سنیما بھی کھلیں گے

سعودی وزارت داخلہ نے بیان میں کہا ہے کہ اتوار7 مارچ سے کورونا ایس او پیز کے تحت لگائی گئی کئی پابندیوں میں توسیع نہیں کی جائے گی۔

ریستورانوں او قہوہ خانو ں میں ٹیبل سروس بحال کی جا رہی ہے جبکہ سنیما، جم اور سپورٹس سینٹرز کھولنے کا فیصلہ کیا گیا ہے۔

سرکاری خبر رساں ایجنسی ایس پی اے نے وزارت داخلہ  کے بیان کے حوالے سے کہا کہ سماجی تقریبات میں زیادہ سے زیادہ بیس افراد شرکت کرسکیں گے۔

وزارت داخلہ نے بیان میں یہ بھی کہا کہ آئندہ مرحلے میں ماسک اور سماجی فاصلے جیسی  پابندیوں پرعملدرآمد یقینی بنانے کے لیے چھاپے بڑھا دیے جائیں گے۔

بیان میں کہا گیا کہ قبرستانوں میں نماز جنازہ کے اوقات کی پابندی جاری رکھی جائے گی۔

وزارت داخلہ کا کہنا ہے کہ تین اور چودہ فروری کے جاری کردہ وضاحتی بیانات میں جن حفاظتی اقدامات کا فیصلہ کیا گیا تھا اب ان میں کوئی توسیع نہیں ہوگی۔

سابقہ دونوں بیانات کے تحت تمام تفریحی پروگرام او سرگرمیوں کو معطل کردیا گیا تھا، سنیما گھر، انڈور تفریحی مراکز اور گیمز سینٹر نیز ریستوران، قہوہ خانوں اور شاپنگ سینٹرز میں موجود  تفریحی سرگرمیوں پر پابندی لگائی گئی تھی۔

 بیان میں کہا گیا کہ اتوار سات مارچ سے ان پابندیوں می توسیع نہ کرنے کا فیصلہ کیا گیا ہے تاہم کئی سرگرمیاں اس سے مستثنی رہیں گی۔

بیان کے مطابق ہر طرح کی تقریبات اور سماجی پروگرام معطل رہیں گے۔ شادی کی تقریبات ، کمپنیوں کے پروگرام پر پابندی برقرار رہے گی۔

شادی گھروں یا ہوٹلوں کے ماتحت تقریبات ہال، استراحات اور اس مقصد کے لیے لگائے جانے والے خیمموں میں بھی کوئی پروگرام نہیں ہوگا۔