مکہ میں محکمہ ٹرانسپورٹ کی بہتری کے لیے مرکز کا آغاز

رائل کمیشن برائے مکہ اور مشاعر مقدسہ نے مکہ میں یونیفائیڈ سینٹر برائے ٹرانسپورٹ کا آغاز کردیا ہے۔

عرب نیوز کے مطابق ایک پریس بیان میں کہا گیا ہے کہ ’یہ مرکز شہر میں ٹرانسپورٹ کے بنیادی ڈھانچے کا مطالعہ کرنے اور اس شعبے میں مختلف پروگراموں کو روبہ عمل لائے گا۔‘

یہ بھی کہا گیا ہے کہ ’یہ مرکز متعلقہ فریقوں اور حکام کو مربوط کرنے کے حوالے سے ایک اہم پلیٹ فارم کا کام کرے گا۔‘

یہ  ٹرانسپورٹ کے شعبے سے متعلق تمام سرگرمیوں اور منصوبوں کی نگرانی بھی کرے گا اور اس شعبے کو اصولوں کے مطابق چلانے کے لیے ایک بنیادی ڈھانچہ تشکیل دے گا۔

مرکز کے تحت ٹرانسپورٹ سیکٹر کی منصوبہ بندی کو یکجا کرنے کا مقصد شہر اور مشاعر مقدسہ میں نقل و حمل کی ضروریات کو پورا کرنا نیز حج اور عمرہ سیزن کے دوران زائرین کی نقل و حرکت کو آسان بنانا ہے۔

بیان میں کہا گیا ہے کہ ’ان منصوبوں سے مقدس شہر کے مکینوں کے لیے ٹرانسپورٹ کے نظام میں بھی بہتری آئے گی۔‘

کمیشن کے چیف ایگزیکٹیو عبدالرحمان بن فاروق اداس نے مکہ اور مقدس مقامات کے آس پاس نقل و حمل کے شعبے کو بہتر بنانے کے منصوبے میں شامل تمام ٹیموں کے کام کی تعریف کی۔

مرکز ماحولیاتی استحکام کے لیے خصوصی اہتمام کے ساتھ منصوبوں کی مالی فزیبلٹی یقینی بنانے پر بھی توجہ دے گا۔

اس بیان میں کہا گیا ہے کہ ’مرکز روڈ سیفٹی میں اضافے کے لیے اقدامات پر عمل درآمد کو بھی یقینی بنائے گا۔‘

• سعودی عرب کی خبروں کے لیے واٹس ایپ گروپ جوائن کریں۔