امارات میں کورونا کے نئے کیسز مسلسل دو ہزار سے زیادہ

متحدہ عرب امارات میں سنیچر 24 اپریل کو پچھلے چوبیس گھنٹے کے دوران کورونا کے دو ہزار 80 نے کیسز سامنے آئے ہیں۔ متاثرین کی تعداد 5 لاکھ 8 ہزار 925 ہوگئی۔

 نئے مریض مختلف قومیت سے ہیں، ان سب کی حالت مستحکم ہے اور انہیں ضروری علاج فراہم کیا جارہا ہے۔

امارات کی سرکاری خبر رساں ایجنسی ’وام‘ نے وزارت صحت کے حوالے سے بتایا کہ ’ پچھلے چوبیس گھنٹے کے دوران جدید طبی آلات کی مدد سے کورونا کے مزید 2 لاکھ 12 ہزار779 ٹیسٹ کیے گئے ہیں‘۔

بیان میں مزید کہا گیا کہ’ وبا سے متاثرہ مریضوں میں سے مزید ایک ہزار 793 مکمل صحتیاب ہوگئے۔ مجموعی طور پر صحتیاب ہونے والوں کی تعداد بڑھ کر 4 لاکھ 90 ہزار 457 ہوگئی ہے‘۔

’پچھلے چوبیس گھنٹے کے دوران زیرعلاج مریضوں میں سے مزید 2 مریض چل بسے۔ مجموعی اموات کی تعداد ایک ہزار 569 ہوگئی ہے‘۔

 وزارت نےعوام کو احتیاطی تدابیر جاری رکھنے اور سماجی فاصلے کی تلقین کی ہے۔

علاوہ ازیں وزارت صحت کے مطابق گزشتہ 24 گھنٹے کے دوران کورونا ویکسین کی مزید ایک لاکھ 5 ہزار 443 خوراکیں دی گئی ہیں۔ اب تک ویکسین کی ایک کروڑ ایک لاکھ 6 ہزار 684 خوراکیں دی جاچکی ہیں۔