بحرین جانے والوں کا ہجوم، سینکڑوں مسافروں نے پل عبور کیا

بیرون ملک سفر کی اجازت ملنے پر سینکڑوں سعودی شہریوں نے بحرین جانےکےلیے کنگ فہد پل کا رخ کیا ہے۔

العربیہ ٹی وی چینل کے مطابق اتوار اور پیر کی درمیانی شب فیصلے کے نفاذ سے پہلے پل کے قریب شہریوں کی گاڑیوں کی بھیڑ لگ گئی۔

 سعودی عرب نے آج پیر سے اپنی تمام سرحدیں مسافروں کے لیے کھول دی ہیں جبکہ شہریوں کو بیرون ملک سفر کی اجازت مل گئی ہے۔

وزارت داخلہ نے قبل ازیں کہا تھا کہ بحرین جانے والے مسافروں کے لیے جو ضوابط مقرر ہوئے ہیں ان میں یہ ہے کہ مسافر کی عمر 18 سال سے زیادہ ہونی چاہیے۔

توکلنا ایپ پر اس نے ویکسین کی دونوں خوراکیں لی ہوئی ہوں یا کورونا لگنے کے بعد ویکسین کی ایک خوراک لی ہو۔ہوزارت نے کہا ہے کہ ’کورونا ویکسین کی ایک خوارک لینے والوں کو بحرین جانے کی اجازت نہیں ہے‘۔

دوسری طرف محکمہ پاسپورٹ نے کہا ہے کہ ’بحرین جانے والے سعودی مسافروں کے لیے پل پر الگ ٹریک مخصوص کیا گیا ہے جبکہ غیر سعودیوں کے لیے الگ ٹریک ہیں‘۔

دوسری جانب بحرینی ٹوئٹر صارفین نے سعودی عرب سے آنے والے مسافروں کی ویڈیو شیئر کی ہے جس میں کئی کلو میٹر تک سعودیوں کی گاڑیاں نظر آرہی ہیں۔