سعودی فنڈ فار ڈویلپمنٹ کی پاکستان کو مہمند ڈیم کے لیے 901 ملین ریال قرض کی منظوری

سعودی فنڈ فار ڈویلپمنٹ نے پاکستان کو مہمند ڈیم کی تعمیر کے لیے 901 ملین سعودی ریال سے زائد قرض دینے کی منظوری دے دی۔ 

قرض 25 سال کی مدت کے لیے دو فیصد شرح سود پر دیا جائے گا۔ 

پاکستان میں تعینات سعودی سفیر نواف سعید المالکی نے سعودی فنڈ فار ڈویلپمنٹ کے بورڈ آف ڈائریکٹرز کے فیصلے سے پاکستان کے وزیر اقتصادی امور عمر ایوب کو باضابطہ طور پر آگاہ کر دیا ہے۔ 

سعودی سفیر نے وزارت اقتصادی امور میں وفاقی وزیر عمر ایوب سے ملاقات کی۔ ملاقات میں سعودی سفیر نے سعودی فنڈ فار ڈویلپمنٹ کے چیئرمین بورڈ آف ڈائریکٹرز احمد بن عقیل الخطیب کا خط پہنچایا۔

خط میں چیئرمین بورڈ آف ڈائریکٹرز کے پاکستان کے ہائیڈرو پاور منصوبے مہمند ڈیم کے لیے قرض کی منظوری کے فیصلے سے آگاہ کیا گیا ہے۔ 

وفاقی وزیر نے سعودی حکومت کا شکریہ ادا کرتے ہوئے کہا کہ حکومت کی ترجیح ہے کہ پن بجلی کے اس منصوبے کو جلد از جلد پایہ تکمیل تک پہنچایا جائے اور ملک میں سستی بجلی کی فراہمی اور پانی کے ذخائر بن سکیں۔ 

انھوں نے کہا کہ پاکستان کے عوام اور حکومت سعودی عرب کی جانب سے مسلسل معاشی تعاون کو قدر کی نگاہ سے دیکھتے ہیں اور باہمی تعلقات میں مزید استحکام اور وسعت چاہتے ہیں۔ 

اس موقع پر سعودی سفیر نے کہا کہ سعودی عرب پاکستان کی ترقی کا خواہاں ہے اور اس حوالے سے پاکستان کے ساتھ تعاون کرتا رہے گا۔ 

انہوں نے کہا کہ وزیراعظم کا حالیہ دورہ سعودی عرب انتہائی کامیاب رہا جس سے دونوں ممالک کے درمیان تعاون اور تعلقات کو فروغ ملے گا۔

سعودی سفیر کا کہنا تھا کہ وزیراعظم پاکاستان کے دورہے میں طے پانے والے معاملات کے ثمرات جلد عوام کے سامنے آ نا شروع ہو جائیں گے۔