کورونا کے ایک ہزار 338 نئے مریض، مزید پندرہ اموات

سعودی عرب میں جمعہ دو جولائی کو کورونا کے ایک ہزار سے زیادہ -نئے کیسز سامنے آئے ہیں جبکہ ایکٹیو کیسز بارہ ہزار سے زیادہ ہوگئے۔ 

جمعے کو سبق نیوز نے وزارت صحت کی جانب سے جاری بیان  کے حوالے سے بتایا کہ ’گذشتہ 24 گھنٹوں کے دوران کورونا کے ایک ہزار 338 نئے مریض سامنے آئے جبکہ  ایک ہزار 208 افراد صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 16 مریض چل بسے، جس کے بعد مرنے والوں کی مجموعی تعداد بڑھ کر سات ہزار 848 ہو گئی ہے۔‘

وزارت کا کہنا ہے کہ ’مملکت میں کورونا کے ایکٹیو کیسز کی تعداد 12 ہزار 288 ہو گئی ہے، جن میں سے ایک ہزار 374 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض شرقیہ ریجن میں سامنے آئے، جن کی تعداد 327 ہے جبکہ ریاض ریجن میں 279 افراد میں وائرس کی تصدیق ہوئی۔‘

مکہ ریجن میں 208، عسیر ریجن میں 127، القصیم ریجن میں 115، مدینہ ریجن میں 109، جازان ریجن میں 55، الحدود الشمالیہ میں 37 ، الباحہ ریجن میں 29، تبوک ریجن میں 21، نجران ریجن میں 16، حائل ریجن میں 13 جبکہ الجوف ریجن میں 2 مریض سامنے آئے ہیں۔

اب تک چار لاکھ 90 ہزار 464 افراد میں کورونا وائرس کی تصدیق ہو چکی ہے جن میں سے چار لاکھ 70 ہزار 328 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘