موسم کی صورتحال: جمعرات کو کہیں بارش اور کہیں گردآلود ہوائیں

سعودی عرب میں موسمیات کے قومی مرکز نے جمعرات کو موسم کی تبدیلیوں سے متعلق پیشگوئی جاری کی ہے۔

اخبار 24 کے مطابق قومی مرکز کا کہنا ہے کہ’ جمعرات پندرہ جولائی کو نجران، جیزان، عسیر اور باحہ کے  پہاڑی علاقوں میں تیز ہوائیں چلیں گی اور بارش کا امکان ہے۔ یہ سلسلہ مکہ مکرمہ کے بالائی مقامات تک پھیل سکتا ہے‘۔

قومی مرکز کا کہنا ہے کہ’ مکہ مکرمہ اور مدینہ منورہ ریجنوں میں گرد آلود تیز ہواؤں کی وجہ سے حد نظر محدود ہوجائے گی۔ الشرقیہ اور الریاض ریجنوں کے جنوبی علاقے بھی اس صورتحال سے دوچار ہوں گے۔ گرد آلود ہواؤں کا سلسلہ نجران تک پھیل جائےگا‘۔

قومی مرکز نے بتایا کہ ’جمعرات کو بحیرہ احمر کے ساحل، مکہ مدینہ کو جوڑنے والی شاہراہ پر تیز ہواؤں کی وجہ سے سامنے کا منظر آنکھوں سے اوجھل ہوجائے گا‘۔

بیان میں قومی مرکز نے کہا کہ ’ سب سے زیادہ درجہ حرارت  45 سینٹی گریڈ وادی الدواسر اور حفر الباطن میں ہوگا جبکہ سب سے کم درجہ حرارت 17 سینٹی گریڈ السودۃ میں رہے گا‘۔