ویکسین سینٹرز میں سکولوں کے طلبہ اور اساتذہ کے لیے خصوصی ٹریک

سعودی وزارت تعلیم نے کہا ہے کہ’ جامعات کے ویکسین سینٹرز میں سکولوں کے طلبہ و طالبات، اساتذہ اور انتظامی عملے کے لیے خصوصی ٹریک بنائے گئے ہیں‘۔

سبق نیوز کے مطابق وزارت تعلیم کا کہنا ہے کہ ’کورونا ویکسین کے سلسلے میں سکولوں کے ساتھ ترجیحی معاملہ کیا جا رہا ہے‘۔

یاد رہے کہ وزارت تعلیم نے فیصلہ کیا ہے کہ آئندہ تعلیمی سال پرسکول باقاعدہ کھولے جائیں گے تاہم ایسے کسی بھی استاد یا اہلکار یا طلبہ میں سے کسی کو سکول میں آنے نہیں دیا جائے گا جس نے ویکسین نہ لگوائی ہو۔

اسی تناطر میں حکام کی انتہائی کوشش ہے کہ سب لوگ نیا تعلیمی سال شروع ہونے سے قبل ویکسین لگوا لیں۔