’لیفٹ ہینڈرز کا عالمی دن‘ ان کرکٹ ستاروں میں آپ کا پسندیدہ کھلاڑی کون ہے؟

جمعہ 13 اگست کو دنیا بھر میں ’لیفٹ ہینڈرز‘ یعنی بائیں ہاتھ کو زیادہ استعمال کرنے والوں کا عالمی دن منایا جا رہا ہے۔

ایسے میں مختلف شعبہ ہائے زندگی سے تعلق رکھنے والے افراد جہاں بائیں ہاتھ کو ’پرائمری ہینڈ‘ کے طور پر استعمال کرنے والوں کا تذکرہ کر رہے ہیں وہیں کچھ صارفین نے اسے ذرا منفرد انداز میں منایا ہے۔

کراچی کے نیشنل سٹیڈیم میں ویسٹ انڈین سٹار کرکٹر برائن لارا کی بیٹنگ کے کلپ سے شروع کیے گئے تھریڈ میں روب موڈی نامی ٹویپ نے معروف لیٖفٹ ہینڈ کرکٹرز کی بیٹنگ و بولنگ سے متعلق یادیں اکٹھی کی ہیں۔

آسٹریلوی ٹیم کے سابق کپتان اور وکٹ کیپر ایڈم گلکرسٹ کی پاکستانی ٹیم کے خلاف بیٹنگ کا کلپ شیئر کرتے ہوئے، تھریڈ میں بائیں ہاتھ سے کھیلنے والے لیجنڈ کرکٹر سر گیری سوبرز کی بیٹنگ کو بھی دکھایا گیا ہے۔

پاکستان کرکٹ ٹیم کے اوپنر سعید انور کی انگلینڈ کے خلاف بیٹنگ اور سابق سوئنگ ماسٹر کہے جانے والے سابق کپتان وسیم اکرم کی بولنگ بھی دکھائی گئی ہے۔

وسیم اکرم سے متعلق کلپ میں وہ آسٹریلوی ٹیم کے خلاف بولنگ کرتے ہوئے پہلے ایڈم گلکرسٹ اور پھر سابق کپتان رکی پونٹنگ کو صفر پر پویلین بھیجتے ہیں۔

1980 میں انگلش ٹیم کے کپتان رہنے والے ڈیوڈ گاور اور انہی کے ہم وطن مڈل آرڈر بلے باز گراہم تھارپ کو بائیں ہاتھ سے کھیلتے ہوئے بھی تھریڈ میں دکھایا گیا ہے۔

آسٹریلوی پیسر مچل جانسن اور سابق کپتان ایلن بارڈر کے کلپس بھی ٹوئٹر پر شیئر کردہ تھریڈ کا حصہ بنائے گئے ہیں۔

دھیمے لہجے کے کرکٹر اور سابق کیوی کپتان سٹیفن فلیمنگ اور جارح مزاج سری لنکن بیٹسمین سنتھ جے سوریا کی یادگار شاٹس بھی بائیں ہاتھ سے کھیلنے والے مشہور کرکٹرز کی فہرست کا حصہ ہیں۔

انگلینڈ کی جانب سے 76 ٹیسٹ اور 123 ایک روزہ میچ کھیلنے والے مارکس ٹریسکوتھک کی اچھی ٹائمنگ والی کچھ شاٹس کے ساتھ سابق سری لنکن کپان کمار سنگاکارا کی 300 رنز کی انفرادی اننگز کے کچھ شاٹس بھی تھریڈ کا حصہ ہیں۔

آسٹریلوی کرکٹر مائک ہسی اور جارح مزاج ویسٹ انڈین بلے باز کرس گیل کے کچھ شاٹس شائقین کرکٹ کو یادیں تازہ کرنے کا موقع دیتے رہے۔

ٹوئٹر صارف کی جانب سے شیئر کردہ تھریڈ میں جن کرکٹرز کو شامل کیا گیا ہے وہ اپنے ادوار میں بیٹنگ اور بولنگ کے شعبوں میں اپنی کارکردگی کا لوہا منوا چکے ہیں۔ ان کے کیریئر ریکارڈز ہی نہیں بلکہ ان کے ساتھ کھیلنے والے کرکٹرز بھی ان کھلاڑیوں کی کارکردگی کے معترف رہے ہیں۔