سعودی چیف آف جنرل سٹاف کی چیئرمین جوائنٹ چیف آف سٹاف کمیٹی سے ملاقات

 سعودی عرب کے چیف آف جنرل سٹاف جنرل فیاض الرویلی نے چیئرمین جوائنٹ چیف آف سٹاف کمیٹی جنرل ندیم رضا اور پاکستان کی فضائیہ کے سربراہ ایئر چیف مارشل ظہیر احمد بابر سدھو سے اسلام آباد میں ملاقات کی ہے۔

پاکستان کی فوج کے شعبہ تعلقات عامہ آئی ایس پی آر کی جانب سے جاری بیان میں کہا گیا ہے کہ سعودی عرب کے چیف آف جنرل سٹاف کی چیئرمین جوائنٹ چیف آف سٹاف کمیٹی جنرل ندیم رضا سے ملاقات میں باہمی دلچسپی کے امور کے علاوہ دفاعی، سیکیورٹی اور انسداد دہشت گردی سے متعلق شعبوں میں باہمی تعاون پر بات چیت کی۔

بیان کے مطابق علاقائی حالات بالخصوص افغانستان اور انڈیا کے زیر انتظام کشمیر میں صورتحال پر تبادلہ خیال کیا گیا۔

سعودی چیف آف جنرل سٹاف اور چیئرمین جوائنٹ چیف آف سٹاف کمیٹی نے دونوں ممالک کے درمیان عسکری رابطوں اور تعاون کو مزید وسیع کرنے پر زور دیا۔

چیئرمین جوائنٹ چیف آف سٹاف کمیٹی کا کہنا تھا کہ عسکری اور سٹریٹیجک تعاون کے لیے دونوں ممالک قومی اور بین الاقوامی معاملات سے متعلق یکساں مؤقف رکھتے ہیں۔

سعودی چیف آف جنرل سٹاف جنرل فیاض الرویلی نے پاکستان کی فوج کی پیشہ ورانہ مہارتوں کی تعریف کی اور دہشت گردی کے خلاف جنگ میں قربانیوں کو سراہا۔

سعودی عرب کے چیف آف جنرل سٹافجنرل فیاض الرویلی نے پاکستان کی فضائیہ کے سربراہ ایئر چیف مارشل ظہیر احمد بابر سدھو سے بھی ملاقات کی ہے۔ 

چیف آف جنرل سٹاف جنرل فیاض الرویلی کے جوائنٹ سٹاف ہیڈ کوارٹر آمد کے موقع پر انہیں گارڈ آف آنر پیش کیا گیا۔

ترجمان پاکستان فضائیہ کی جانب سے جاری بیان میں کہا گیا ہے کہ ملاقات کے دوران پیشہ ورانہ اور باہمی دلچسپی کے امور پر تبادلہ خیال کیا گیا ہے۔

بیان کے مطابق جنرل فیاض الرویلی نے پیشہ ورانہ مہارت اور ایوی ایشن انڈسٹری میں خود انحصاری کی طرف گامزن پاکستان کی فضائیہ کی تعریف کی۔

ایئر چیف مارشل نے کہا کہ پاکستان اور سعودی عرب کے مابین دیرینہ مذہبی، ثقافتی اور تاریخی رشتہ قائم ہے جو دونوں فضائی افواج کے مابین مضبوط روابط کا مظہر ہے۔

ایئر چیف مارشل ظہیر احمد کا کہنا تھا کہ دونوں برادر ممالک کے درمیان خوشگوار تعلقات قائم ہیں۔ انہوں نے پاکستان اور سعودی عرب کے درمیان باہمی تعاون کو مزید فروغ دینے کے عزم کا اعادہ کیا۔