الجوف کے نخلستان کی تازہ کھجوریں بازاروں میں

سعودی عرب میں الجوف کے نخلستان تازہ کھجوریں بازاروں کو فراہم کرنے لگے ہیں۔ ان دنوں یہاں ہر طرف کھجوروں کے گچھے دلکش شکل میں نظر آرہے ہیں۔

سرکاری خبر رساں ایجنسی ایس پی اے کے مطابق کھجوروں کے قومی مرکز نے الجوف کے حوالے سے اعدادوشمار جاری کرکے بتایا کہ یہاں کھجور کے 9 لاکھ  84 ہزار 48 درخت ہیں۔ ان میں سے 7 لاکھ 98 ہزار 649 درخت 43 ہزار 208 ٹن کھجوریں دے رہے ہیں۔ ان میں سے 34 ہزار 45 ٹن کھجوریں فروخت ہوتی ہیں۔ باقی نخلستانوں کے مالکان گھریلو استعمال کے لیے محفوظ کر لیتے ہیں۔ 

ان دنوں الجوف کے بازاروں میں دو رنگوں والی ’المنقد‘ کھجوروں کی بہار آئی ہوئی ہے۔ مقامی باشندے اسے ’حلوۃ الجوف‘ (الجوف کی مٹھائی) کہتے ہیں۔ 

الجوف کے بازاروں میں کھجوریں پیش کرنے کا اپنا انداز ہے۔ تین، تین کلو گرام کے چھوٹے چھوٹے ڈبوں میں کھجوریں سجا کر پیش کی جاتی ہیں۔ کھجوریں مختلف قسم کی ہوتی ہیں اور ہرقسم کے نرخ الگ ہیں۔

عام طور پر حلوۃ الجوف نامی کھجور کا پیکٹ 25 ریال میں فروخت ہورہا ہے جبکہ الخلاص نامی کھجور کا پیکٹ 35 ریال میں فروخت ہورہا ہے۔ ام الحمام ، المکتومیۃ، البرحی، الحسینیہ، قسبہ مدق، بویضا، خذما وغیرہ کی قیمت بھی یہی ہے۔

الجوف کے شہروں اور بڑے قصبوں میں کھجوروں کی منڈیاں سجی ہوئی ہیں۔ الجوف میونسپلٹی نے اعلان کیا ہے کہ سکاکا شہر میں کھجور مارکیٹ تیار کردی گئی ہے۔گورنر شہزادہ فیصل بن نواف نے نخلستانوں کے مالکان کی حوصلہ افزائی اور مارکیٹ میں معاشی سرگرمیوں کے فروغ کے لیے اس کا بندوبست کیا ہے۔ 

الجوف میونسپلٹی کے ترجمان عمر الحموان نے کہا ہے کہ سکاکا میں کھجور میلے کی تیاریاں مکمل ہیں۔ اس سال دوسری بار میلہ لگے گا۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں