ورلڈکپ میں محمد رضوان، بابر اعظم مشکل بیٹسمین ہوں گے: ٹرینٹ بولٹ

آئی سی سی کی ون ڈے رینکنگ میں پہلے نمبر پر براجمان نیوزی لینڈ کے فاسٹ بولر ٹرینٹ بولٹ کا کہنا ہے کہ پاکستان کے محمد رضوان اور کپتان بابر اعظم اس سال ہونے والے ٹی 20 ورلڈ کپ میں سخت حریف ثابت ہوں گے۔

آئی سی سی کے ایک انٹرویو کے دوران میزبان نے ٹرینٹ بولٹ سے پوچھا کہ ’آپ کیا سمجھتے ہیں کہ اس ورلڈکپ میں بولنگ کرنے کے لیے سب سے مشکل بیٹسمین کون ہوگا؟‘

اس سوال کے جواب میں کیوی فاسٹ بولر نے کہا کہ ’میں سمجھتا ہوں کہ یہاں بہت سارے اچھے کھلاڑی ہیں، میرے خیال میں پاکستان کے محمد رضوان، وہ ایک بہترین کھلاڑی ہیں۔‘

انہوں نے مزید کہا کہ بابر اعظم ایک بہت کلاسی کھلاڑی ہیں اور ہر فارمیٹ میں بہترین کھلاڑی ثابت ہوتے ہیں۔

محمد رضوان اور بابر اعظم کے علاوہ ان کا کہنا تھا کہ آئرلینڈ کے پال اسٹرلنگ بھی ورلڈ کپ کے دوران بولنگ کے لیے ایک مشکل بیٹسمین ہوں گے۔

ٹی ٹوئنٹی ورلڈ کپ رواں سال 17 اکتوبر سے شروع ہوگا جو عمان اور متحدہ عرب امارات میں کھیلا جائے گا۔

ورلڈ کپ سے قبل پاکستان اور نیوزی لینڈ کی ٹیمیں رواں مہینے ون ڈے اور ٹی 20 میچز میں مدمقابل آئیں گی۔ یہ میچز پاکستان کے شہر راولپنڈی اور لاہور میں کھیلے جائیں گے۔

دونوں ٹیموں کے درمیان پہلا ون ڈے 17 ستمبر، دوسرا 19 ستمبر اور تیسرا 21 ستمبر کو راولپنڈی میں کھیلا جائے گا۔

اس کے علاوہ دونوں ٹیمیں لاہور میں پانچ ٹی 20 میچز بھی کھیلیں گی۔