دنیا کی سب سے بڑی چھپکلیوں کی نسل خطرے سے دوچار کیوں؟

انڈونیشیا میں ایک چڑیا گھر دنیا کی سب سے بڑی چھپکلیوں کو معدومیت سے بچانے کی کوشش میں کوموڈو ڈریگن کی افزائش کر رہا ہے۔

برطانوی خبر رساں ادارے روئٹرز کے مطابق موسمیاتی تبدیلی سے اس خوفناک مخلوق کے لیے نئے خطرات پیدا ہو رہے ہیں۔

نوجوان ڈریگن اپنی لمبی زبانوں کے ساتھ سورابایا شہر میں چڑیا گھر کے اندر رینگتے نظر آتے ہیں۔

ان میں سے کچھ مادہ ڈریگن کے لیے لڑتے ہیں جبکہ بعض تالاب میں شکار تلاش کرتے ہیں۔

یہ دیوہیکل چھپکلیاں صرف دور دراز جزیرے کوموڈو اور مشرقی انڈونیشیا کے کئی پڑوسی جزیروں پر پائی جاتی ہیں۔

ستمبر میں انٹرنیشنل یونین فار کنزرویشن آف نیچر نے موسمیاتی تبدیلی کے اثرات سے پیدا ہونے والے خطرے کا حوالہ دیتے ہوئے انہیں خطرے سے دوچار نسلوں کی ریڈ لسٹ میں شامل کیا تھا۔

اس نے خبردار کیا کہ بڑھتے ہوئے عالمی درجہ حرارت اور سطح سمندر سے آئندہ 45 برسوں میں کوموڈو ڈریگن کی مناسب رہائش گاہ میں کم از کم 30 فیصد کمی متوقع ہے۔

چڑیا گھر کے حکام کو امید ہے کہ چھپکلیوں کو بچانے کی ان کی کوششیں گلاسگو میں جمع ہونے والے عالمی رہنماؤں کی توجہ اس جانب مبذول کرائیں گی کہ وہ موسمیاتی تبدیلی سے لڑنے کے لیے اقدامات کریں۔

اس پروگرام کو شروع کرنے کے بعد سے چڑیا گھر نے اپنی کموڈو ڈریگن کی آبادی 108 بڑے اور 35 نوعمر ڈریگنز تک پہنچائی ہے۔

چڑیا گھر کے ایک اہلکار کا کہنا ہے کہ انہیں امید ہے کہ یہ منصوبہ اس بات کو یقینی بنائے گا کہ آنے والی نسلیں ڈریگن کو صرف تصویروں میں نہیں بلکہ حقیقی زندگی میں دیکھ سکیں گی۔