شاہد آفریدی پی ایس ایل سے دستبردار، ’برداشت کی ہمت ختم ہو گئی‘

 شاہد آفریدی نے پاکستان سپر لیگ سے الگ ہونے کا اعلان کر دیا۔

اتوار کو اپنے ویڈیو پیغام میں شاہد آفریدی نے اپنے مداحوں کا شکریہ ادا کرتے ہوئے کہا کہ ان کی انجری کی تکلیف بہت بڑھ چکی ہے جس کی وجہ سے وہ پی ایس ایل کے باقی میچز نہیں کھیل سکیں گے۔

انہوں نے کہا کہ ’یہ ویڈیو میرے فینز کے لیے ہے۔ میں ان کا شکریہ ادا کرنا چاہتا ہوں کہ جس طرح میرے پورے کیریئر میں انہوں نے میری سپورٹ کی ہے۔ میرے فینز بالکل اسی طرح ہیں جس طرح میری فیملی میرے لیے اہم ہے۔‘

’میں پی ایس ایل کو اچھے نوٹ پر ختم کرنے کی کوشش کر رہا تھا، لیکن میری کمر کی انجری بہت پرانی ہے۔ میں پندرہ سولہ سال سے اسی انجری کے ساتھ کھیل رہا ہوں۔‘

انہوں نے مزید کہا کہ ’وہ انجری اس حد تک بڑھ گئی ہے کہ اس کی وجہ سے میرے گھٹنوں اور پاؤں کی انگلیوں تک بہت زیادہ درد ہوتا ہے۔‘

’اور اس درد کو میں بہت مشکل سے برداشت کر کے لے کر چل رہا ہوں۔‘

’میں چاہ رہا تھا کہ پی ایس ایل اچھے نوٹ پر ختم ہو لیکن اب برداشت کی ہمت ختم ہو رہی ہے۔‘

’میں آپ سب فینز کا شکریہ ادا کرنا چاہتا ہوں کیونکہ میں فینز کی وجہ سے ہی یہ آخری پی ایس ایل کھیلنا چاہ رہا تھا۔ لیکن میں دو تین ماہ میں بہتر ہو کر آؤں گا کیونکہ آگے کے پی ایل بھی ہے۔‘

’ان شاء پھر کسی لیگ میں اپنے فینز کے سامنے دوبارہ آؤں گا۔‘