’اپنی حدود سے تجاوز نہ کریں‘ بابراعظم اور وسیم اکرم کے درمیان کیا ہوا؟

پاکستان سپر لیگ (پی ایس ایل) میں اب تک 9 میچز کھیلنے کے باوجود کراچی کنگز کی ٹیم اب تک کوئی میچ نہیں جیت سکی ہے۔

بدھ کی رات ملتان سلطانز کے ہاتھوں کراچی کنگز کو سات وکٹوں سے شکست ہوئی تھی۔ سوشل میڈیا صارفین کے مطابق مسلسل شکستوں کی وجہ سے شاید کراچی کنگز کے ہیڈ کوچ وسیم اکرم دل برداشتہ ہو گئے ہیں۔

گزشتہ رات میچ کے دوران وسیم اکرم کے چہرے پر غصے کے تاثرات نمایاں تھے اور ایک وقت ایسا بھی آیا جب کیمرے نے انہیں کپتان بابر اعظم پر غصہ کرتے ہوئے دکھایا۔

وسیم اکرم کا بابر اعظم سے بات کرنے کا انداز کپتان کے پرستاروں کو پسند نہیں آیا اور سوشل میڈیا صارفین اس حوالے سے خفگی کا اظہار کر رہے ہیں۔

بابر اعظم اور وسیم اکرم کی بات چیت کا سکرین شاٹ شیئر کرتے ہوئے ارشد خان تنولی نامی صارف نے لکھا کہ وسیم اکرم کا پاکستان کرکٹ ٹیم کے کپتان سے ایسا برتاؤ مایوس کن ہے۔

انہوں نے مزید لکھا کہ ’وہ (بابر اعظم) ہمارے ہیرو ہیں، دنیا کے بہترین کھلاڑی ہیں۔ ہار اور جیت کھیل کا حصہ ہے لیکن آپ انہیں ایسے ڈانٹ نہیں سکتے۔‘

ان مناظر پر تبصرہ کرتے ہوئے عروج جاوید نامی صارف نے لکھا ’وسیم اکرم اپنی حدود سے تجاوز نہ کریں۔‘

میچ کے دوران بابر اعظم اور وسیم اکرم کی گفتگو کی ویڈیو بھی سوشل میڈیا پر وائرل ہوئی۔

دوسری جانب بابر اعظم کے پرستار انہیں پی ایس ایل کی فکر نے کرنے اور اگلے ماہ آسٹریلیا کے خلاف سیریز پر توجہ دینے کا مشورہ دیتے ہوئے نظر آرہے ہیں۔

کراچی کنگز کی خراب کارکردگی کے باوجود بابر اعظم پی ایس ایل کے اس ایڈیشن میں اپنی ٹیم کی جانب سے سب سے زیادہ رنز بنانے والے بیٹسمین ہیں۔

بابر اعظم آٹھ میچوں میں اب تک 38.28 کی اوسط سے 268 رنز بنا چکے ہیں اور اس سال اس ٹورنامنٹ میں ان کا سب سے زیادہ انفرادی سکور 90 ہے۔

وسیم اکرم کا ردعمل

وسیم اکرم نے بابر اعظم سے باؤنڈری لائن پر ہونے والی گفتگو کے حوالے سے وضاحت دیتے ہوئے ایک ٹویٹ میں کہا کہ ’میں بابر اعظم اور اپنے درمیان ہونے والی گفتگو پر سامنے والے ردعمل پر حیران ہوں۔‘

ان کا کہنا تھا کہ ’میں یہ کہہ رہا تھا کہ ہمارے بولرز کیوں یارکر اور آف سائیڈ پر سلو گیندیں نہیں کروارہے۔‘

انہوں نے مزید لکھا کہ ’بابر ایک اچھے لڑکے ہیں اور اپنی طرف سے پوری کوشش کرتے ہیں۔‘