شاہ محمود قریشی کا روسی وزیر خارجہ سے رابطہ، کشیدگی میں کمی لانے پر زور

وزیر خارجہ مخدوم شاہ محمود قریشی کا روسی فیڈریشن کے وزیر خارجہ سرگئی لاوروف کے ساتھ ٹیلیفونک رابطہ ہوا۔ دوران گفتگو دو طرفہ تعلقات اور علاقائی صورتحال پر تبادلہ خیال کیا گیا۔

 سنیچر کو وزارت خارجہ کی جانب سے جاری بیان میں کہا گیا کہ وزیر اعظم کے حالیہ دورہ روس کا حوالہ دیتے ہوئے دونوں وزرائے خارجہ نے دو طرفہ ایجنڈے اور افغانستان سمیت خطے کے اہم موضوعات پر تفصیلی تبادلہ خیال کیا۔

روسی وزیر خارجہ سرگئی لاوروف نے پشاور میں ہونے والے حملے میں قیمتی انسانی جانوں کے ضیاع پر گہرے رنج اور افسوس کا اظہار کرتے ہوئے روس کی طرف سے ہر قسم کی دہشت گردی کی مذمت پر زور دیا۔

بیان کے مطابق دونوں وزرائے خارجہ نے افغانستان میں امن و استحکام کے مشترکہ اہداف کے لیے مل کر کام جاری رکھنے پر اتفاق کیا۔

وزیر خارجہ نے یوکرین کی تازہ ترین صورتحال پر پاکستان کی تشویش کا حوالہ دیتے ہوئے ہوئے اقوام متحدہ کے چارٹر کے بنیادی اصولوں کے مطابق کشیدگی میں کمی لانے کی ضرورت پر زور دیا۔

 وزیر خارجہ نے کثیر جہتی معاہدوں، بین الاقوامی قانون اور اقوام متحدہ کے چارٹر کے تحت تنازع کے سفارتی تصفیے کی ضرورت پر زور دیا۔

وزیر خارجہ نے مسئلے کے پرامن حل کے لیے یوکرین، پولینڈ، رومانیہ اور ہنگری کے وزرائے خارجہ اور یورپی یونین کے اعلیٰ نمائندے برائے خارجہ امور کے ساتھ ہونے والے حالیہ ٹیلیفونک رابطوں سے آگاہ کیا۔

شاہ محمود قریشی نے کہا کہ ’توقع ہے کہ روس اور یوکرین کے درمیان شروع ہونے والے مذاکرات سفارتی حل تلاش کرنے میں کامیابی سے ہمکنار ہوں گے۔‘

روسی وزیرخارجہ نے وزیر خارجہ مخدوم شاہ محمود قریشی کو صورت حال پر روس کے نقطہ نظر سے آگاہ کیا۔

وزیر خارجہ نے اس بات پر زور دیا کہ یوکرین سے پاکستانی شہریوں کی محفوظ اور جلد واپسی حکومت کی اولین ترجیح ہے اور اس ضمن میں روسی حکومت سے مدد اور سہولت فراہم کرنے کی درخواست کی۔

روسی وزیر خارجہ نے پاکستانی شہریوں کے محفوظ انخلا کے حوالے سے مکمل تعاون کا یقین دلایا۔ دونوں وزرائے خارجہ کا ابھرتی ہوئی صورتحال پر رابطے جاری رکھنے پر اتفاق ہوا۔