ایلون مسک ٹوئٹر کے بورڈ آف ڈائریکٹرز میں شامل

ٹوئٹر کے مطابق لگژری کاریں بنانے والی کمپنی ٹیسلا کے سی ای او ایلون مسک کو کمپنی کے بورڈ آف ڈائریکٹرز میں شامل کر لیا گیا ہے۔

فرانسیسی خبر رساں ایجنسی اے ایف پی کے مطابق منگل کو ٹوئٹر کے سی ای او پراگ اگروال نے ایک ٹویٹ میں لکھا کہ ’ہم ایلوم مسک کو اپنے بورڈ آف ڈائریکٹرز میں شامل کر رہے ہیں۔‘

ان کا کہنا تھا کہ ’حالیہ ہفتوں میں ایلون کے ساتھ ہونے والی گفتگو سے یہ واضح ہو گیا کہ ان کی شمولیت سے بورڈ کو بہت فائدہ ہوگا۔‘

ایلون مسک 2024 میں ٹوئٹر کے شیئر ہولڈرز کی سالانہ میٹنگ تک بورڈ میں شامل رہیں گے۔

ایلون نے وعدہ کیا ہے کہ وہ اس دوران ٹوئٹر کے 14.9 فیصد سے زیادہ شیئرز نہیں خریدیں گے۔

گذشتہ روز ایلون مسک اس پلیٹ فارم کے سب سے بڑے شیئرہولڈر بن گئے تھے۔

پیر کو سٹاک ایکسچینج نے کہا کہ مسک نے 14 مارچ کو حصص خریدے تھے۔ اس کا مطلب یہ ہے کہ ایلون مسک نے ٹوئٹر پر اپنی عوامی گفتگو شروع کرنے سے پہلے حصص حاصل کیے تھے۔

اس سے قبل ایلون مسک نے ٹوئٹر کی آزادانہ اظہار رائے کی پالیسی پر سوال اٹھاتے ہوئے کہا تھا کہ ’یہ پلیٹ فارم جمہوریت کو نقصان پہنچا رہا ہے۔‘

اس کے باوجود مسک نے ٹوئٹر کے مقابلے میں ایک سوشل میڈیا نیٹ ورک شروع کرنے کا امکان بھی ظاہر کیا تھا۔

ایلون مسک جو خود بھی ٹوئٹر کے سرگرم صارف ہیں، وہ سوشل میڈیا پلیٹ فارمز کی پالیسیوں پر تنقید کرتے رہتے ہیں۔

ان کا موقف ہے کہ ٹوئٹر آزادی اظہار کے اصولوں کی پاسداری کو یقینی بنانے میں ناکامی کی وجہ سے جمہوری اقدار کا ساتھ نہیں دے رہا۔

ایلون مسک کا یہ ٹوئٹ ایسے وقت میں سامنے آیا تھا جب انہوں نے ٹوئٹر پر ایک پول میں صارفین سے یہ پوچھا تھا کہ ’کیا ٹوئٹر آزادیٔ اظہار کے اصولوں کی پاسداری کر رہا ہے؟‘ ۔ جس کے جواب میں 70 فیصد افراد کا جواب نفی میں تھا۔

مسک نے ٹوئٹر پر اپنے 80 ملین سے زیادہ فالوؤرز کو بتایا کہ وہ اپنا سوشل میڈیا پلیٹ فارم بنانے پر ’سنجیدگی سے‘ غور کر رہے ہیں۔