یقین ہے پاکستان کی سیاسی صورتحال سے سی پیک متاثر نہیں ہوگا: چین

چین کا کہنا ہے اسے امید ہے کہ پاکستان میں کسی بھی قسم کی سیاسی صورتحال سے دونوں ممالک کے درمیان تعاون پر متاثر نہیں ہوگا۔

جمعرات کو میڈیا بریفنگ کے دوران چینی دفتر خارجہ کے ترجمان لیجیان ژاؤ کا کہنا تھا کہ ’ہمیں یقین ہے کہ مجموعی طور پر چین اور پاکستان کے درمیان تعاون اور سی پیک منصوبے پاکستان میں سیاسی صورتحال سے متاثر نہیں ہوں گے۔‘

چینی دفتر خارجہ کی جانب سے ٹوئٹر پر جاری ایک ویڈیو میں لیجیان ژاؤ کا کہنا تھا کہ ’چین مخلصانہ امید رکھتا ہے کہ پاکستان میں تمام سیاسی جماعتیں متحد رہیں گی اور قومی ترقی اور استحکام کے لیے مل کر کام کریں گی۔‘

خیال رہے تین اپریل کو پاکستان کی قومی اسمبلی میں وزیراعظم عمران خان کے خلاف تحریک عدم اعتماد انہی کی جماعت کے ڈپٹی سپیکر ایک ’دھمکی آمیز‘ مراسلے کو بنیاد بناتے ہوئے مسترد کردی تھی اور صدر عارف علوی نے وزیراعظم کی ایڈوائس پر اسمبلی کو تحلیل کردیا تھا۔

اسمبلی کی تحلیل کے اعلان کے بعد پاکستان میں حزب اختلاف کی جماعتیں وزیراعظم عمران خان کے خلاف احتجاج کررہی ہیں۔

واضح رہے وزیراعظم عمران خان کا دعویٰ ہے کہ ان کی حکومت کے خلاف بیرونی سازش ہورہی اور اس سازش کا الزام وہ امریکہ پر لگاتے ہیں۔

ملک میں جاری سیاسی بے یقینی اور متوقع آئینی بحران کو مدنظر رکھتے ہوئے سپریم کورٹ نے اس معاملے کا ازخود نوٹس لیا تھا جس کی سماعت جاری ہے اور توقع کی جارہی ہے کہ جلد فیصلہ سنادیا جائے گا۔