20 بجلی گھر دوبارہ فعال، وزیراعظم کی یکم مئی سے لوڈشیڈنگ ختم کرنے کی ہدایت

وزیراعظم شہباز شریف نے یکم مئی سے ملک میں لوڈ شیدنگ مکمل ختم کرنے کی ہدایت کرتے ہوئے کہا ہے کہ ’عوام کو گرمیوں میں بجلی کی لوڈشیڈنگ سے مشکلات میں مبتلا نہیں کر سکتے۔‘

وزیراعظم نے دیہی علاقوں میں ڈیزل کی مصنوعی قلّت پیدا کرنے والوں کی نشان دہی کر کے ان کے خلاف کارروائی کی بھی ہدایت کی ہے۔

وزیراعظم آفس سے جاری کیے گئے اعلامیے کے مطابق منگل کو وزیراعظم شہباز شریف کی زیرِ صدارت ملک میں بجلی کی اعلانیہ اور غیر اعلانیہ لوڈشیدنگ کے حوالے سے اعلی سطح کا ہنگامی اجلاس منعقد ہوا۔

وفاقی وزیرِ اطلاعات مریم اورنگزیب، سابق وزیراعظم شاہد خاقان عباسی اور متعلقہ اعلی حکام نے اجلاس میں شرکت کی۔

وزارت توانائی کی جانب سے بریفنگ میں بتایا گیا ہے کہ ’ایک سال سے زائد عرصے سے بند پڑے 27 بجلی گھروں میں سے 20 کو فعال بنا دیا گیا ہے۔ 20 بجلی گھروں کے دوبارہ چلنے سے بجلی کی پیداوار میں اضافہ ہوا ہے۔ 

بریفنگ کے مطابق گزشتہ حکومت نے چار سال میں بجلی گھروں کے لیے ایندھن نہیں خریدا۔ موجودہ حکومت نے صرف دو ہفتے میں نہ صرف ایندھن کا انتظام کیا بلکہ ان بجلی گھروں سے بجلی کی پیداوار بڑھا کر لوڈ شیڈنگ کا سدِ باب بھی کیا جا رہا ہے۔‘

اجلاس کو بتایا گیا کہ ملک میں بجلی کی مجموعی پیداوار تقریباً 18500 میگاواٹ ہے۔  طلب کے لحاظ سے بجلی کا شارٹ فال 500 سے 2000 میگاواٹ ہے۔

’لوڈشیڈنگ کی بڑی وجہ گزشتہ حکومت کا بجلی گھر چلانے کے لیے ایندھن کی بروقت فراہمی کا منصوبہ نہ ہونا ہے۔ لوڈ شیڈنگ کی دیگر وجوہات میں ایندھن فراہمی میں مسائل، بجلی گھروں کی بروقت مرمت اور دیکھ بھال میں مجرمانہ غفلت ہے۔‘

وزیراعظم شہباز شریف کو حکومت سنبھالتے ہی بریفنگ دی گئی تھی کہ 27 بجلی گھر ایندھن نہ ہونے یا دیگر تکنیکی خرابیوں کی وجہ سے بند پڑے ہیں۔ وزیرِاعظم نے فی الفور ان بجلی گھروں کو فعال بنانے کی ہدایات جاری کی تھیں۔  

اس کے علاوہ وزیراعظم کو تقسیم کار کمپنیوں کے خسارے میں جانے والے فیڈرز کے حوالے سے بھی تفصیلی طور پر آگاہ کیا گیا۔

وزیرِاعظم نے 30 اپریل تک تمام مسائل کا سد باب کرکے یکم مئی سے بجلی کی لوڈشیڈنگ کو ختم کرنے کی ہدایات جاری کر دی ہیں۔ 

شہباز شریف نے کہا کہ ’عوام کو گرمیوں میں بجلی کی لوڈشیڈنگ سے مشکلات میں مبتلا نہیں کر سکتے۔ ایندھن کے مربوط اور مستقل نظام کی تشکیل اور گرمیوں میں آئندہ ماہ کی پیشگی منصوبہ بندی کریں۔‘

اجلاس کے دوران وزیراعظم نے نقصان میں جانے والی بجلی کی تقسیم کار کمپنیوں کے فیڈرز کے خسارے ختم کرنے کی طویل مدتی مؤثر منصوبہ بندی طلب کر لی۔

فصلوں کی کٹائی کے دوران ڈیزل کی مصنوعی قلت پیدا کرنے کی شکایت پر وزیراعظم نے سخت نوٹس لیتے ہوئے کہا کہ ’مصنوعی قلت پیدا کرنے والوں کی نشاندہی کریں، فوری اور سخت کارروائی کریں۔‘

ان کا کہنا تھا کہ ’کسانوں کو زرعی مشینری چلانے کے لیے ڈیزل کی بلاتعطل فراہمی یقینی بنائی جائے۔ دیہی علاقوں میں ضلعی انتظامیہ یقینی بنائے کہ کسانوں کو ڈیزل کے حصول میں کسی قسم کی مشکلات کا سامنا نہ ہو۔‘

دوسری جانب سابق حکمران جماعت تحریک انصاف کا کہنا ہے کہ حکومت کی نالائقی کی وجہ سے ملک کو لوڈشیڈنگ اور ڈیزل کی عدم دستیابی کا سامنا ہے۔ بجلی کی پیداواری صلاحیت موجود ہے لیکن موجودہ حکومت بروئے کار نہیں لا سکی۔ ڈیزل کا بلند ترین ذخیرہ موجود ہے لیکن قیمت پہ ابہام پیدا کر کے ذخیرہ اندوزی شروع کروا دی۔ 

سابق وزیر توانائی حماد اظہر کا کہنا ہے کہ ’موجودہ حکومت کی نااہلی ہے کہ انہوں نے فرنس آئل پھونکنے کے بعد جلدبازی میں تاریخ کے مہنگے ترین ایل این جی کارگو خریدے جس سے فی یونٹ لاگت 30 روپے تک ہوگی اور عوام کو اگلے دو ماہ میں فیول ایڈجسٹمنٹ کی مد میں ناقابل برداشت بوجھ اٹھانا ہوگا۔‘  

حماد اظہر نے 27 پاور پلانٹس کی بندش کے حکومتی دعوے کو غلط قرار دیتے ہوئے کہا کہ ’صرف پانچ پاور پلانٹس ایسے ہیں جن کی مرمت کا کام جاری ہے اور وہ بھی نجی شعبے سے ہیں۔ان کی وجہ سے لوڈ شیڈنگ نہیں ہونی چاہیے۔‘

ان کا کہنا تھا کہ ’موجودہ حکومت پندرہ دنوں میں  متبادل ایندھن کا فوری انتظام کرنے میں ناکام رہی ہے یہ ان کی بد انتظامی کا منہ بولتا ثبوت ہے۔‘