کرکٹ ٹیم کے سابق کپتان شاہد آفریدی ٹوئٹر پر ٹاپ ٹرینڈ کیوں؟

پاکستان کرکٹ ٹیم کے سابق کپتان شاہد آفریدی نے عید کے پہلے روز سما ٹی وی پر اپنے بچوں کے ہمراہ ایک انٹرویو میں سیاست سے متعلق بھی گفتگو کی۔

ایک سوال کے جواب میں انہوں نے کہا کہ ’انہیں شہباز شریف پسند ہیں کیونکہ وہ بہترین ایڈمنسٹریٹر ہیں، میں نے اسرائیل کے نہیں بلکہ اپنے ہی ملک کے وزیراعظم کو مبارک باد دی تھی۔‘

اس انٹرویو میں شاہد آفریدی نے سابق وزیراعظم عمران خان کے حوالے سے کہا کہ ’میں نے 2013 میں پہلی مرتبہ کسی کو وٹ دیا تھا کیونکہ عمران خان سے امیدیں تھیں لیکن ان سے بہت غلطیاں ہوئی ہیں جس کو انہیں ماننا چاہیے۔ ’عمران بہترین لیڈر ہیں پر ان کے پاس ٹیم نہیں تھی جو تھے وہ سائیڈ پر ہوگئے۔‘

 شاہد آفریدی کا مزید کہنا تھا کہ ’پارلیمنٹ گراؤنڈ ہے اور عمران خان کو گراؤنڈ نہیں چھوڑنا چاہیے اور دوبارہ کنٹینر پر نہیں آنا چاہیے بلکہ پارلیمنٹ میں رہ کے کام کریں۔‘

دوسری جانب سوشل میڈیا صارفین کی اکثریت اس انٹرویو پر شاہد آفریدی کو نہ صرف تنقید کا نشانہ بنا رہی ہے بلکہ انہیں ایک ناکام کرکٹر کے طور پر بھی پیش کرہی ہے، تاہم بعض صارفین سابق کپتان کو قومی ہیرو بھی قرار دے رہے ہیں۔

ٹی وی اداکار کاشف محمود نے ٹوئٹر پر ایک ویڈیو میں شاہد آفریدی کے کرکٹ کیریئر پر تبصرہ کرتے ہوئے کہا کہ ’ہماری کرکٹ کی اصل بربادی کا ذمہ دار صرف ایک شخص ہے اور وہ ہے ’شاہد آفریدی۔‘

ٹوئٹر صارف ڈاکٹر فاطمہ نے تنقید کرتے ہوئے لکھا ہے کہ ’شاہد آفریدی، امیدیں تو ہمیں بھی آپ سے بہت ہوتی تھیں جب آپ زیرو پر آؤٹ ہو کر آجاتے تھے لیکن ہم نے کبھی سچن ٹنڈولکر کو سپورٹ نہیں کیا۔‘

اداکارہ وینا ملک نے لکھا کہ ’شاہد آفریدی ٹیسٹ، ون ڈے اور ٹی20 کے ٹوٹل میچز میں 470 بار صفر پر آؤٹ ہوئے ہیں۔‘

انہوں نے نشان دہی کرتے ہوئے مزید لکھا کہ ’گیند کو جو چَک مار کے کھا گیا تھا وہ تو آپ جانتے ہیں۔‘

صحافی اقرارالحسن نے اپنے ٹویٹ میں لکھا ہے کہ ’یاد رکھیں شاہد آفریدی اور ان جیسے بہت سے لوگ عمران خان یا ان کی حکومت پر اس لیے تنقید کرتے ہیں کہ وہ عمران خان سے پیار کرتے ہیں، انہیں خان صاحب سے توقعات تھیں یا شاید اب بھی ہیں۔ ہر تنقید بغض میں نہیں ہوتی۔‘

اقرارالحسن نے سابق کپتان کو قومی ہیرو قرار دیتے ہوئے لکھا کہ ’اختلاف پر بھی شاہد آفریدی جیسے قومی ہیروز کا احترام کیجیے۔‘